Rêxistina Mafên Mirovan banga şandina komîteyeke lêpirsînê ji bo herêmên dagirkirî kir

Rêxistina Mafên Mirovan a Cizîrê daxuyaniyek da û tê de bang kir ku dagirkeriyê bi dawî bikin, koçber bi garantiyên navneteweyî li bajarên xwe vegerin.

Bi beşdariya bi dehan koçberên Serêkaniyê, Hevseroka Rêxistina Mafên Mirovan a herêma Cizîrê Evîn Cuma daxuyanî li pêşiya navenda Komseriya NY’yê ya li Qamişlo xwend. Di daxuyaniyê de hate got: "Du sal di ser êriş û dagirkirina Serêkaniyê û Girê Spî re derbas bûn ku ji hêla dagirkeriya Tirk û çeteyên wê ve hatine dagirkirin. Seranserî sînor bi dirêjahiya 150 kîlometere û kûrahiya 32 kîlometre hatin dagirkirin."

SÛCÊN ŞER

Di daxuyaniyê de hat destnîşankirin ku di encamê êriş û dagirkirina her du bajaran de bi deh hezaran sivîl bi dare zorê koçber bûn.

GUHARTINA DEMOKRATÎK

Di daxuyaniyê de ev hate gotin: "Piştî dagirkirina wan her du herêman, çeteyan malbatên xwe li wir bi cih kirin û bi dehan malbatên çeteyên biyanî yên tundraw li wan herêman hatin bicihkirin."

XWESTEK

Di berdewamiya daxuyaniyê de wiha hate gotin: "Em Rêxistina Mafên Mirovan a Cizîrê ne. Me di nava du salên borî de gelek binpêkirinên ku dewleta Tirk û komên mûxalefta Sûrî li dijî sivîlên li herêmên dagirkirî û li ser sînor pêk anî, belge kir. Ji bo vê jî em li gorî derfetên xwe û ji ber derfetê nadin rêxistinên hiqûqî yên serbixwe ku derbasî herêmên dagirkirî bibin da ku bûyeran bi awayekî serbixwe bikşînin, bang dikin ku:

-Dagirkerkirina dewleta Tirk ji herêmê re bidawî bibe. Em banga hêzên parastina aştiyê yên navneteweyî dikin da ku piştî dagirkeriyê herêmê li gorî pîvan û xwestekên NY`yê û qanûna navneteweyî bişopîne.

-Hikûmeta Tirkiyê berpirsa lêpirsîna kuştin, koçberkirin, guhertina demografîk, revandina li beramberî pereyan, girtina bêserûber e, divê ew û kesên pê re kar dikin werin darizandin.

-Komîteya navneteweyî – lêpirsîna navneteweyî ya taybet û serbixwe bi lez ji aliyê meclisa hiqûqî ya mirovan a girêdayî NY`yê ve ji bo herêmên dagirkirî wekî Girê Spî û Serêkaniyê were şandin, da ku derbarê binpêkirinan de lêpirsînê veke û raporan rake û berpirsên sûcan werin cezakirin.

-Ji bo vegera ewle ya şêniyên koçber û rakirina hemû astengiyan bi garantiya navneteweyî xebat were kirin.

-Bi lez xebat were kirin da ku çarenûsa kesên hatine revandin were eşkerkirin û serbest werin berdan.

-Xebat were kirin da ku topbarana li dijî şêniyên were sekinandin.

(bx)

ANHA