Şêniyên Şedadê şehîdekî Erka Xweparastinê oxir kir

Bi sedan şêniyên navçeya Şedadê ya gundewarê başûrê Hesekê ya Bakur û Rojhilatê Sûriyê û endamên saziyên leşkerî û sivîl beşdarî merasima oxirkirina endamê Hêzên Erka Xweparastinê Mihemed Hisên El-Mihemed bûn.

Mihemed Hisên El-Mihemed di 11`ê Cotmehê de dema erka xwe ya leşkerî li navçeya El-Deşîşa pêk dianî, şehîd bû.

Karwanê erebeyan ji pêşiya Saziya Malbatên Şehîdan a Hesekê ber bi goristana şehîdan a li Şedadê ve bi rê ket. Li goristanê endamên Erka Xweparastinê toraneke leşkerî li dar xist.

Di merasim de yek ji fermandarên Hêzên Erka Xweparastinê Ebid Mihemed El-Sayir axivî û  sersaxî ji malbata şehîd re xwest.

El-Sayir bal kişand ser berdewamiya têkoşîn û berxwedana gelên herêmê, ji bo qewitandina dagirker û çeteyan û rizgarkirina herêmên dagirkirî. Her wiha destnîşan kir ku li dijî herêmê şerên leşkerî, siyasî û aborî û şerê taybet tê meşandin.

Piştre li ser navê Meclisa Malbatên Şehîdan, Nacî E-Nicûm wiha got: "Em çiqas behsa qehremaniya şehîdan bikin, dîsa jî em nikarin heqê wan bidin, lê belê em dilsozên fedekariyên wan bin.”

Saziya Malbatên Şehîdan wesîqeya şehadetê radestî malbata şehîd Mihemed Hisên El-Mihemed kir. Cenazeyê şehîd li goristana şehîdan a Şedadê hate veşartin. 

(dx)

ANHA