Li Helebê yekemîn dibistana bi materyalên Rêveberiya Xweser waneyan dide, vebû

Komîteya Perwerde û Fêrkirinê ya Civaka Demokratîk (KPC-D) ‎li Helebê yekemîn dibistana bi navê şehîd Qehreman Efrîn vekir ku tê de materyalên Rêveberiya Xweser ên bi zimanên erebî û kurdî tên dayîn.‎

Dibistan li Kolana Mizgefta Mezin a Şêxmeqsûdê ye. Komîteyê dibistan ji bermahiyên şer paqij kir û ji nû ve restore kir.  ‎

Kadroya perwerdeyê ya dibistanê ji 40 mamosteyan pêk tê. Ev mamoste dê zêdetirî 600 ‎xwendekarên refên seretayî, navîn û amedehî perwerde bikin.‎

Ji bo ku xebatên perwerdeyê baş bên meşandin KPC-D’ê servîs ji xwendekaran re bê pere dabîn kir, pênûs û lênûsk li xwendekaran belav kirin.

Li gorî endamê rêveber ê KPC-D’ê Mihemed Behrî, dibistan di 5`ê Îlonê de hat vekirin. Behrî da zanîn beriya vekirina dibistanê wan bi tevlêbûna meclis û komînan hemleyên ravekirina girîngiya zimanê dayikê di nava şêniyên taxê de li dar xistine.

Behrî piştrast kir ku ji bo ku fêrkirina materyalên Rêveberiya Xweser ên zimanên kurdî û erebî ‎ wan hemû derfetên pêwîst peyda kirin û wiha got: "Di materyalên Rêveberiya Xweser de cudahiyeke balkêş heye, ew jî tê de du madeyên girîng hene; jineolojî û çand û sinc."

Behrî bang li şêniyan kir û ev tişt got: "Divê zarokên we bi zimanê dayikê fêr bibin da ku civak li gorî ‎qonaxa heyî bi pêş bikeve."‎

Behrî spasiya xwendekarên Dibistana Şehîd Qehreman û xebatkarên wê kir, ji ber ku firsendek peyda bû ku zarok li gorî materyalên demokratîk dûrî rêbazên lêdanê û şîdetê fêrî zimanê dayikê bibin.

Li gorî Behrî, KPC-D’ê dê şahiyeke bi boneya vekirina dibistanê li dar bixe.‎

Hêjayî gotinê ye ku li Dibistana Şehîd Qehreman berê perwerde bi ‎zimanê kurdî dihat dayîn, lê belê îsal bi zimanên kurdî û erebî li gorî materyalên ‎Rêveberiya Xweser hat vekirin. ‎

‏(‏dm)

ANHA