Li Reqayê Mîhrîcana Zarokan dest pê kir

Bi beşdariya 14 komên stran, dîlan û şanoyan, Mîhrîcana"Kulîlkên Zaroktiyê" ya Duyemîn li bajarê Reqayê dest pê kir.

ÇAND Û HUNER

5 tîrmeh, 2021 14:33

REQA

Çalakiyên Mîhrîcana Kulîlkên Zarokatiyê ya Duyemîn vê sibehê bi dirûşmeya "Ji bo zarokatiyê dijîn" li hola Tac a bajarê Reqayê dest pê kir. Mîhrîcan ji aliyê Komîteya Çand û Şûnwaran a Meclisa Sivîl a Reqayê ve hatiye organîzekirin. Bi dehan şênî, nûnerên saziyên civakî û partiyên siyasî amade bûn.

Çalakî bi rêzgirtinê dest pê kir, piştre endama Navenda Çand û Hunerê ya Reqayê Senaa Ebas bi xêrhatina mêvanan kir û got: "Zarokên me beriya niha ji ber şer nekarîn behreyên xwe geş bikin, lê îro me ev mîhrîcan li dar xistiye da ku karibin rûyê wan xweş bikin û behreyên wan ku çete hewl dan binax bikin, geş bikin."

Cîgirê Hevserokatiya Meclisa Sivîl a Reqayê Hesen Mistefa axivî û got: "Mîhrîcana zarokan mîhrîcana aştî, ewlehî û şadkirina zarokan e. Ev tecrûbeyeke zindî ku îşaretê bi rewşa zarokan a di pêvajoya salên derbasbûyî de pê re rû bi rû man dike, ji armancên me yên sereke behre û karînên wan ên hunerî geş bikin ye da ku xewn û hêviyên wan bi cih bînin."

Paşê Koma Nesaim El-Firat û Koma Zarokan a Dêrazorê şanoyek bi navê "Zaroktiya min li min vegerînin" pêşkêş kir. Şano balê dikişîne li ser rewşa xwendekaran di dema dagirkirina çeteyên DAIŞ`ê de ku ji xwendinê bê par mabûn.

Her wiha Koma Zarokan a Reqayê stranên kurdî û erebî pêşkêş kirin

Koma kelepurî ya dîlana gelerî bi beşdariya 16 zarokan, dîlaneke stranî ya bi navê"Ya Xitar El-Lîl" pêşkêş kir. Komê cil û bergên Ereban li ber xwe kirin ku nîşaneya kelepura ereban a li herêmê dide.

Zarokên bi navên Ehmed û Heyder El-Fekaş stranên ji çanda Heleb û Firatê gotin.

Çalakiya roja yekemîn bi gerandina govendên gelerî bi dawî bû.

Tê payîn ku çalakiyên mîhrîcanê li gundewarê bajarê Reqayê heta 8`ê Tîrmehê dewam bike.

(eh)

ANHA