`Hikumeta Iraqê şerekî taybet bi hewldana derxistina fitneyê pêk tîne`

Endamê Mala Êzidî Ednan Kalo diyar kir ku biryara dervekirina 4 ciwanên êzidî yên bi kuştina 2 ciwanên ereb hatine tawanbarkirin ji biryareke hiqûqî zêdetir biryarekî siyasî ye û bi hewldana derxistina fitneyê ye.

17 gulan, 2021 07:44

HESEKÊ-BOTAN HISÊN

Dadgeha cinayetê ya Iraqê di 21’ê Nîsanê de cezayê bidarvekirina 4 ciwanên êzidî bi tawana kuştina 2 ciwanên ji eşîra El-Şemer di 10’ê Îlona 2020’an de li ser rêya di navbera Til Ezîz û Şengalê de, da.

Civaka êzidî hêrs û berteka xwe li hember vê biryarê nîşan da û da zanîn ku cezayê bidarvekirinê berdewama fermanên li dijî civaka êzidî û qirkirina dawî ya ku çeteyên DAIŞ’ê di 2014’an de pêk aniye, ye.

‛MASKE’

Girêdayî mijarê, endamê Mala Êzidî Ednan Kalo diyar kir ku biryara bidarvekirina ciwanên êzidî maskeke ku di binê wê de gelek rastiyên dîtir veşartî ne û wiha got: "Cezayê bidarvekirinê li dijî kesayetên welatparêz, çalakvan û siyasetmedarên civaka êzidî ku li dijî zilm, kiryar û sûcan sekinîne, hate birîn."

Kalo wiha domand: "Hikumeta Iraqê tu ceza li dijî kesên ku ferman di 3’yê Tebaxa 2014’an de li dijî êzidiyan pêk anîne, şêniyên êzidî revandin, koçber kirin, bi hezaran jin, mêr û zarok firotine, nebirî."

Şêniyên êzidî di 3’yê Tebaxa 2014’an de, piştî vekişîna hêzên hikumetên Bexda û Hewlêrê, rastî êrişa çeteyên DAIŞ’ê hatin.

‛BIRYAR SIYASÎ YE’

Ednan Kalo destnîşan kir ku biryara dadgeha Iraqê ya bidarvekirina ciwanên êzidî biryareke siyasî, ji dêvla bibe biryara hiqûqî li ser asta dewletê ye û wiha pê de çû: "Hikumeta Iraqê bi rêya vê biryarê hewl dide civaka êzidî hişyar bike ku tu berxwedan an jî têkoşîna ji bo rêxistinkirina rêveberiya xweser a Şengalê pêk nayên."

Kalo axivî ku ev rêbaza ku hikumeta Iraqê li hember civaka êzidî bi kar tîne bi hewldana ku civaka êzidî çand, ol û rêveberiya xwe ya xweser înkar bike anku wan ber bi îmha û têkçûnê ve bibe.

‛DERXISTINA FITNEYÊ’

Kalo wiha axivî: "Armanca biryara darvekirinê piştî fermana 2014’an, ew e ku hikumeta Iraqê hewl dide rêbaza şerê taybet bimeşîne da ku fitneyê di navbera Êzidî û Erebên ku bi hev re bi biratî dijîn de derbixe. Ji ber ku eşîrên Ereb, bi taybet eşîra El-Şemer di êrişa çeteyên DAIŞ’ê ya li ser Şengalê ya 2014’an de piştgiriya êzidiyan kir."

Kalo da zanîn ku rejîmên dewletan ji kevIn de ji yekitiya gelan ditirsin. Ji ber ku yekitiya gelan rêbazên van rejîman ku di şeran de bi kar tînin, lawaz dike.

Ednan Kalo li dawiyê bang li civaka êzidî û ereb kir ku li pey van lîstok û propogandayan neçin, yekitî û rêveberiya xwe ya xweser biparêzin. Her wiha bang li rêxistinên hiqûqî, mirovahî, siyasî û çandê kir ku sînorekî ji qirkirina êzidiyan re deynin.

(fr)

ANHA