33 rêxistinên hiqûqî dagirkirina Efrînê şermezar kir

33 rêxistin û navendên li hundir û derve daxuyaniyek bi raya giştî re parve kir. Di daxuyaniyê de dagirkirina Efrînê hat şermezarkirin û banga bidawîkirina dagirkirin û vekişandina çeteyan kirin da ku niştecihên resen li warê xwe vegerin.

Di daxuyaniyê de hate gotin ku 3 sal di ser dagirkeriya dewleta Tirk û komên çete re derbas dibe, bi vê yekê dewleta Tirk pîvanên NY`yê bi taybet madeya 2`yemîn binpê dike.

Her wiha hate diyarkirin ku li Efrînê gelek sûc li dijî niştecihên wê têne kirin û dewleta Tirk di nava 3 salan de kuştin, îşkencekirin, revandin, koçberkirina bi darê zorê, guhertina demografiyê, binpêkirina cihên olî yên êzidiyan û goristanan, pêk anî.

33 rêxistinan di daxuyaniya xwe de destnîşan kir ku ev hemû li pêşiya çavên civaka navneteweyî pêk tên û li beramberî vê yekê jî bê deng in. 

Rêxistinan got ji ber wê jî diviyabû ku erka belgekirina sûcên ku dagirker pêk tînin, bigrin ser milê xwe û ji civaka navneteweyî û rêxistinên hiqûqî yên navneteweyî re eşkere bikin û bang li wan bikin ku zextê li dewleta Tirk bikin da ku sûcên xwe bisekinîne, erkên xwe yên qanûnî pêk bîne, dagirkirina herêmên kurdî bi dawî bike, ew û çeteyên xwe vekişin da ku niştecihên ku bi darê zorê neçarî koçberiyê bûne, li warê xwe vegerin.

Rêxstinên ku daxuyanî dane ev in: Navenda Çavdêriya Mafên Mirovan a Sûriyê, Desteya Qanûnî ya Kurdî, Komeleya Gelên bi Qirkirinê re Rû bi Rû ne –Almanya, Toreya Efrîn Post a Nûçeyan, Navenda Belgekirinê ya Bakurê Sûriyê, Afrîn Media Center, Saziya Êzidiyan, Komxebata Almanî ya Kurdî, Komeleya Civaka Kurdî li Stuttgartê, Komeleya Hêvî ya Kurdî-Belçîka, Rêxistina Mafên Mirovan a Efrîn – Sûriyê, Rêxistina Civaka Sivîl a Kurdî ya Ewropayê, Rêxistina Mafên Mirovan a Sûriyê, Rêxistina Mehabad, Yekitiya Êzidiyên Sûriyê, Navenda Edil a Mafên Mirovan, Navenda Lêkolînên Qanûnî – Almanya, Navenda Rojava ya Lêkolînên Stratejîk (NRLS), Însiyatîfa Parastina Hiqûqî ya Sûriyê, Rêxistina Mafên Mirovan a Cizîrê, Rêxistina Mafên Mirovan a Firatê, Yekitiya Parêzerên Efrînê, Komîteya Mafên Mirovan a Sûriyê, Komeleya Kurdî ya Parastina Mafên Mirovan – Nemsa, Kurdên Sînornenas, Saziyên Civaka Sivîl a Herêma Şehbayê, Yekitiya Parêzeran a Bakur û Rojhilatê Sûriyê, Yekitiya Parêzeran a Herêma Cizîrê, Navenda Zagros a Mafên Mirovan – Swîsre, Koma Xebatê ji bo Efrînê, Yekitiya Kurdan li Swîsreyê, Weqfeya Zagon û Navenda Sûriyê ya Mafên Mirovan.

(bx)

ANHA