Zarokên Kobanê bi boneya Newrozê şahiyek li dar xist

Şahî ji aliyê Desteya Çand Hunerê ya Herêma Firat, Tevgera Kevana Zêrîn ve li Navenda Çand û Hunerê ya Baqî Xido ve hate lidarxistin.

Bi sedan zarok û malbatên wan bi cil û bergên xwe yên folklorîk, nûnerên partiyên siyasî, Rêveberiya Xweser a Herêma Firatê beşdarî şahiyê bûn.

Şahî bi deqeyeke rêzgirtin dest pê kir. Piştre endamê Desteya Rêveber a Partiya Yekitiya Demokratîk (PYD) Ehmed Şêxo axivî û cejina Newrozê li zarok û tevahî gelê Kurd pîroz kir û got: "Divê berî her kesî em li zarokan pîroz bikin, ji ber ku ew nifşên pêşeroja azad a tevahî gelê Kurd e."

Endama Rêveber a Tevgera Kevana Zêrîn a Herêma Firatê Guljîn Hiso axivî û destnîşan kir ku zarok ji ber şer gelek êş û azar dîtine, her wiha hêviya pêşerojeke ewle û azadî ji tevahî zarokên cîhanê re xwest.

Piştî axaftinan, Koma Muzîkê ya Dibistana Navenda Baqî Xido, Koma Şehîd Şîlan a Govendên Gelêrî, Koma Şehîd Mistefa ya Şano, Koma Çerkes a Govendên Gelêrî ya Minbicê, Koma Şehîd Barîn a Muzîkê û Koma Tevgera Kevana Zêrîn hunerên xwe pêşkêş kirin.

Her wiha helbest hatin gerandin. Şahî bi diruşmeyên silavkirina Newrozê û berxwedana Îmraliyê bi dawî bû.

(dm)

ANHA