Saziya Olaf Tao, bi boneya Roja Zimanê Dayikê ya Cîhanê panelek li dar xist

Li Qamişloyê Saziya Olaf Tao ya Suryan bi dirûşma “Ên ku zimanê xwe winda kiriye, xwe winda dikin” têkildarî dîroka zimanê suryanî û têkiliya di navbera wê û zimanê erebî de panelek li dar xist.

Di panelê de Destya Perwerde û Fêrkirinê ya Rêveberiya Xweseriya Demokratîk, Partiya Yekitiya Suryan û endamên komeleyên Suryan, Keldan û Asûr beşdar bûn.

Di destpêka panelê de hevserokê Saziya Olaf Tao Calînos Îsa got: “Em dê bi rêya biratiya gelan hemû zimanan ji windabûnê biparêzin.”

Îsa îşaret pê kir ku li gorî qanûnên UNESCO`yê ji bo parastina çand û dîroka xwe, ji mafê her zarokekî/ê ye ku di 3 salên pêşîn de fêrî zimanê dayikê bibe. Îsa xebatên ku ji bo parastina zimanê suryanî tên kirin û Saziya Olaf Tao silav kir ku mamosteyan amade dike da ku zimanê suryanî fêr bikin.

Her wiha Calînos Îsa di berdewama axaftina xwe de ev yek zelal kir: “Piştî ku Rêveberiya Xweser a Bakur û Rojhilatê Sûriyê ava bû, me zanî ku rojek ji bo ziman heye. Rêveberiyê mafê her pêkhateyekê dayê ku zimanê xwe biparêze. Ji ber ku ji bo parastina mîras û dîroka gelan ew rêya tekane ye.” 

Mamosteyê Saziya Olaf Tao Îlî Fîlo jî axivî û behsa dîroka zimanê suryanî kir. Her wiha destnîşan kir ku zimanê suryanî beşek ji zimanê aramî ye. Îlî Fîlo got: “Di serdema xîlafeta Ebasî de li ser asta zimanê suryanî gelek xebat hatin kirin, nexasim di aliyê wergerê de. Bi belavbûna zimanê erebî re, suryaniya resen bi erebî re têkil bû û gelek zarava jê derketin.” 

Hevseroka Saziya Olaf Tao Jozfîn Somî jî behsa dîroka zimanî suryanî kir.

Saziya Olaf Tao girêdayî Desteya Perwerde û Fêrkirinê ya Rêveberiya Xweser a Bakur û Rojhilatê Sûriyê ye. Mamosteyan ji bo dayîna waneyên bi zimanê suryanî, digihîne.

(şx)

ANHA

<iframe width="560" height="315" src="https://www.youtube.com/embed/11f-d7Mh6Og" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>