Eşîrên Dêrazorê: Eşîr û QSD li hemberî dijmin di yek xendekê de ne

Bertekên li dijî êrişên artêşa Tirk ên li ser Eyn Îsayê hîn jî didomin, nexasim ji aliyê şêx û rûspiyên eşîrên Ereban ve. Eşîran êrişên li dijî xaka Sûriyê şermezar kirin û soza şopandina rêya şehîdan da.

Têkildarî mijarê ji şêxên eşîra Bûkemalê, şex Îbrahîm El-Nicim, êrişên artêşa Tirk ên li dijî Bakur û Rojhilatê Sûriyê, sûcên li dijî gelê li herêmên dagirkirî û hewldana dagirkirina Eyn Îsayê şermezar kirin. El-Nicim piştrast kir ku eşîrên Ereb beriya niha li dijî dagirkeriya Osmanî sekinîn û dê li dijî dagirkeriya Osmanî ya nû jî bisekinin.

Îbrahîm El-Nicim wiha got: "Em êrişên artêşa Tirk a dagirker red dikin û dibêjin siyaseta li dijî me pêk tê, hewldana zindîkirina dagirkeriya Osmanî ya berê ye, lê em wekî gelê herêmê, zarok û ciwanan, dê li dijî dagirkeriyê bisekinin. Bihaneyên Tirkiyê yên avakirina herêma ewle lîstokek ji lîstokên dewleta Tirk e û dagirkerî pandemiyeke mezin li dijî gelan e."

El-Nicim bang kir ku pêwîstî bi yekitiyê û sekna li hember tevahî dagirkeran heye, nexasim jî li dijî artêşa Tirk.

Îbrahîm El-Nicim di dawiya gotina xwe de got QSD û Rêveberiya Xweser a Bakur û Rojhilatê Sûriyê ewlehiya wan mîsoger dikin, ji ber ew nûnertiya wan in.

Li aliyekî din jî rûspiyekî Dêrazorê Sabit El-Hemada jî axivî û destnîşan kir ku ew dizanin ku qurbaniyên vê dagirkeriyê gelê Sûriyê ye, ji lew re bang li gelê Sûriyê dikin ku yekitiya xwe bi tevahî pêkhate û etnîkan ava bikin.

Sabit El-Hemada got bêdengiya navneteweyî ji sûcên dewleta Tirk re wekî şewqa kesk e, nexasim bêdengiya Rûsyayê ya ku idîa dike ku ew garantor e. Sabit El-Hemada eşkere kir ku eşîrên Ereb ên li Dêrazorê amade ne ku li rex QSD’ê şer li hember êrişên dewleta Tirk ên li dijî Eyn Îsayê bikin.

Rûspiyekî eşîra Dêrazorê Xalid El-Mihemed jî axivî ku gelê herêmê dê ewlehî û aramiya ku bi saya QSD`ê û Rêveberiya Xweser hatiye bidestxistin, ji destê xwe bernedin.

Xalid El-Mihemed bang li tevahî aliyan kir ku yekitiya xwe ava bikin, nakokiyan ji holê rakin û li dijî dewleta Tirk û çeteyên wê bisekinin.

(eh)

ANHA