Şêniyên Qamişloyê li dijî komploya li ser Şengalê meşiyan

Li herêmê nerazîbûna gel a li dijî lihevkirina Hikumeta Federal a Iraqê û Partiya Demokrat a Kurdistanê (PDK) ya girêdayî rêveberiya Şengalê, zêde dibin. Îro şêniyên navçeyên Tirbespiyê û Girkê Legê bi du çalakiyên cuda lihevkirin şermezar kir.

TIRBESPIYÊ

<iframe width="560" height="315" src="https://www.youtube.com/embed/f7beI746kAM" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>

Bi dehan pêkhateyên navçeya Tirbepsiyê ya kantona Qamişloyê meşiyan û bang kirin ku komploya li dijî civaka Êzidî rawestînin û rêz ji vîna wî re were girtin ji bo ku çaranûsa xwe bi xwe diyar bike.

Meş ji ber navenda Kongreya Star a li navçeyê destpê kir. Girseya gel pankartên bi nivîsên “Komkujiya Şengalê nayê jibîrkirin” û alên Meclisa Malbatên Şehîdan, Kongreya Star û partiyên siyasî rakirin.

Di meşê de endama Rêveberiya Kongreya Star a navçeyê Xaliye Eyûb û bi navê pêkhateyên navçeyê endamê Meclisa Rûspiyan Hisên Sade axivîn.

Her du axaftvanan destnîşan kir ku lihevkirina di navbera hikumeta Iraqê û PDK`ê de berdewama komployên li dijî vîna civaka Êzidî ye.

Her wiha diyar kir ku divê civaka navneteweyî civaka êzidî ji qirkirinan biparêzin û şaştiyên berê dubare neke.

Di dawiya meşê de şêniyan sloganên piştgiriya gelê Êzidî û silavkirina berxwedana Yekîneyên Berxwedana Şengalê (YBŞ) berz kirin.

GIRKÊ LEGÊ

Li Girkê Legê jî bi sedan şêniyên navçeyê û gundên girêdayî wê daketin qadan û komploya li dijî gelê êzidî yê li Şengalê red kir.

Şêniyan alên Yekîneyên Parastina Gel (YPG-YPJ) hildan û lihevkirina li dijî Şengalê şermezar kir.

Meş ji Qada Şehîd Xebat dest pê kir û li naverasta navçeyê veguherî mîtîngê.

Endamê Partiya Yekitiya Demokratîk (PYD) a navçeyê Idrîs Ehmed axivî û got: “PDK`ê sala 2014`an xiyanet li Şengalê kir û şêniyênwê bi tenê bi dijmin re rû bi rû hiştin. DAIŞ`ê jî komkujiyên hovane li dijî gelê êzidî pêk anîn. Lê bi saya piştgiriya Hêzên Parastina Gel (HPG) Şengal ji DAIŞ`ê rizgar bû û rêveberiya wê ya xweser hate avakirin.”

Ehmed axaftina xwe wiha domand: “Hikumeta Iraqê û PDK rêgeza jiyana hevbeş a ku şengaliyan bi xwe xwe ava kiriye, red dikin. Lewra hewl didin destkeftiyên gelê me yê li wir têk bibin. Fitne û şeran derxin. Em ji gelê xwe re dibêjin, em ê alîkariya we bikin û em nahêlin bûyerên 2014`an dubare bibin.”

Meş bi berzkirina sloganên silavkirina berxwedana Şengalê bi dawî bû.

(şx)

ANHA