Li Dêrikê salvegera damezirandina PKK'ê hate pîrozkirin

Şêniyên Dêrikê bi diruşmeya "Bi rihê damezirandina tevgera azadiyê em ê têkoşînê xurt bikin û dagirkeriyê têk bibin" salvegera 42'an a damezirandina PKK'ê pîroz kirin.

NÛÇE

27 mijdar, 2020 15:19

QAMIŞLO

Şahî ji aliyê Meclisa Malbatên Şehîdan ve li navenda Tevgera Ciwanên Şoreşger a Şehîd Bawer hate lidarxistin. Bi hezaran şêniyên Dêrikê, Berav û herêma Koçerat beşdar şahiyê bûn. Navend bi wêneyên rêber Abdullah Ocalan, damezrînerên tevgerê, al û sembolên Tevgera Rizgariya Kurdistanê, YPG, YPJ û QSD'ê hat xemilandin.

Şahî bi deqeyeke rêzgirtin dest pê kir. Endamê rêveber ê Meclisa Malbatên Şehîdan a Dêrikê Heqî Ararat axivî, salvegera damezirandina PKK'ê li rêber Abdullah Ocalan, şehîdan û şervanên li eniyên şer pîroz kir.

Ararat got: "Pêngava Tevgera Rizgariya Kurdistanê gelê kurd li her çar parçeyên Kurdistanê kir yek û nirxên mirovahiyê û gelên azadîxwaz parast. Tevî ku rêbertî di girtîgeha Îmraliyê de ye, lê fikir û felsefeya wî li tevahî cîhanê cîhanê belav bûn. Gelên azadîxwaz xeta wî dişopînin, ji ber ku rêber Apo ji bo wan têkoşiya û hîn jî têdikoşe."

Piştî, Koma Cûdî stranên şoreşgerî û folkolrî gotin.

Şahî bi gerandina xelkên govendê bi dawî bû.

ANHA