Îsal dê li Kobanê 500 hezar dar werin çandin

Rêveberiya Giştî ya Jînegehê ya herêma Firatê amadekariya çandina 500 hezar dar li herêmê dike.

20 mijdar, 2020 09:51

KOBANÊ

Rêveberiya Giştî ya Jînegehê ya herêma Firatê dê îsal li Kobanê, gundewarên wê, sazî û dibistanên wê nîv milyon dar biçîne.

Par li şitilgeha Miştenûr nêzî nîv milyon darên cur bi cur hatin çandin. Ew darên ku hatine çandin wê îsal li kantona Kobanê û gundewarên wê werin çandin.

Rêveberiya Jînegehê ya herêma Firatê, par daristana Hêvî cara yekem li kantonê çand û tê de zêdetirî 12 hezar dar heye. Daristan li gundê Xorxorî ya rojavayê kantonê ye.

Girêdayî mijarê, hevserokê Rêveberiya Giştî ya Jînegehê ya herêma Firatê Semîr Elî wiha got: "Kadroyên şitilgeha Miştenûrê îsal amadekariya çandina nîv milyonên darên berhemdar û bêberhem, li herêmê dikin. Ew dar dê li dibistan, saziyan û li ser rêyên bajêr bi çend merheleyan werin çandin.

Li gorî Semîr Elî, cureyên darên ku dê îsal bên çandin ev in: Sewlî, sinober, darên xemilandinê; xurme, murcan, efes, û darên berhemdar; hejîr, fistiq helebî, gûz û behîv.

Semîr Elî wiha domand: "Îsal me vekirina şitilgeha Hedato ya li bajarokê Şêran bi dawî kir û her wiha xebata li ser vekirina şitilgeha li navçeya Qenayê dikin, bi wê re jî li cem me 3 şitilgeh bi tevahî cureyên daran amade ne."

Elî wiha gotina xwe bi dawî kir: "Em xebata vekirina daristaneke nû li gundê ekolojiyê dikin, ku tê de 8 hezar dar hebin. Ew xebat jî dê li ser du merheleyan be. Di her merhelekê de wê 4 hezar dar werin çandin.

(fr)

ANHA