Bi hinceta "Herêm leşkerî ye" rewşa koçberan paşguh dikin

Bi hatina zivistanê re, azarên koçberên Serêkaniyê û gundên derdorê yên di dibistan û kampan de dimînin, zêde dibin.

Li dibistanên navçeya Til Temirê ya kantona Hesekê û gundên wê zêdetirî hezar û 200 malbatên koçber hene.

Ji ber ku herêm nêzî eniyên şer e, rêxistinên mirovî wê weke herêmeke leşkerî binav dikin û bi wê hincetê derbasî wir nabin. Ji ber kêmbûna miqdara alîkariya ku ji wan re tê pêşkêşkirin, azarên wan zêde dibin.

Koçberên ku di dibistanên navçeyê de dimînin, azarên xwe rave kirin û pêdiviyên ku pêwîstiya wan pê hene vegotin.

Koçbera bi navê Xezala Ehmed a ji gundê Erîşe di dibstanekê Til Temirê de dimîne dibêje: “Dema artêşa Tirk a dagirker û çeteyên wê bajarê Serêkaniyê topbaran kir, em ji gund derketin û me berê xwe da Til Temirê û di dibistanên wê de bi cih bûn.”

Xezala bi bîr xist ku di destpêka bicihbûna di dibistanê de, alîkarî digihîştin wan lê ji derdora 9 mehan ve tu alîkarî ji wan re nehatiye pêşkêşkirin û tu rêxistinek alîkariya wan nekiriye.

Xezala bal kişand ser binpêkirinên dagirkeran û got: “Gundê me Erîşe ji ber binpêkirinên dagirkeran û talankirina milkên sivîlan navdar bû. Êdî em nikarin vegerin gund.”

Her wiha Xezala desntîşan kir ku bi hatina zivistanê re rewşa wan gelek dijwar bûye û wiha pê de çû: “Zarokên min biçûk in. Pêwîstiya me bi sobe, mazot û alîkariyan heye. Em bang li rêxistinên navneteweyî û aliyên têkildar dikin ku alîkariya me bikin û bijîşkan bişînin navendên koçberan da ku zarokan muayene bikin.”

Ji Adarê ve tu alîkarî negihîştiya koçberên ku li navçeyê dimînin. Tenê Xaça Sor pakêtên xwarinê yên ku ji şekir û zeyt pêk tê ji wan re pêşkêş dike.

Koçbera bi navê Zehra El-Efdel go: “Pêwîstiya me bi sobe û mazotê heye. Zivistan hat û zarokên me biçûk in.”

Zehra El-Efdel da zanîn ku ew dixwazin vegerin bajarê xwe û wiha domand: “Em dixwazin vegerin malên xwe û divê dewleta Tirk a dagirker û çeteyên wê jê derkevin."

Têkildarî derbasbûna rêxistinan ji navçeya Til Temirê re, endamê rêveber ê Kar û Barên Rêxistinan ê li navçeyê Xelîl Xelo got rêxistinên mirovî bi hinceta ku herêm leşkerî ye derbasî navçeyê nabin.

Xelo diyar kir ku li Til Temirê zêdetirî hezar û 200 malbatên koçber hene û dema alîkarî ji rêxistinan xwestine, ji wan re gotin ku ev herêm leşkerî ye û nikarin derbasî wê bibin.

(şx)

ANHA