Ji qebîleya Igêdat 125 kes tev li refên QSD'ê bûn

Piştî bûyerên fitneyên li gundewarê Dêraozêr û bi armanca parastina ewlehiya herêmê ji qebîleya Igêdat a li Dêrazorê 125 ciwan tev li refên Hêzên Sûriya Demokratîk (QSD) bûn.

15 îlon, 2020 14:19

DÊRAZOR

Ciwanên tev li QSD'ê bûne dê 45 rojan perwedeyên siyasî, fikirî û leşkerî û bikaranîna çekan bibînin.

Li gorî fermandariya leşkerî ya Akademiya Şehîd Egîd a Dêrazorê "Piştî bûyerên ku li gundewarê Dêrazorê rû dan, jê qetilkirina şêx Metreş El-Hefel û hewldanên derxistina fitneyê ji aliyê rejîma Sûriyê û Tirkiyê ve, ciwanên qebîleya Igêdat xwestin parastina ewlehiya herêmê xurt bikin û li hemberî terorîst û kesên ku hewl didin aramiya herêmê xirab bikin bisekinin."

Elî El-Celûd ê ji qebîleya Igêdat got, piştî zêdebûna bûyerên qetilkirina sembolên herêmê, biryar da ku tev li Hêzên Sûriya Demokratîk bibe da ku li hemberî şaneyên terorîstan ên ku ajnîde û berjewendiyên dewletên mîna Tirkiyê li herêmê bisekine.

Omer Abdullah El-Cerwan û Mûsa Xelef jî heman tişt gotin û diyar kirin ku ji bo parastina ewlehiya herêmê bibin mertal û destkeftiyên şehîdan biparêzin.

Piraniya ciwanên ku tev li QSD'ê bûne ji bajaroka Şihêl a gundewarê rojhilatê Dêrazorê ne.

ANHA