57 cenazeyê endamên tugeya 93 ji du gorên komî hatin

Îro tîmên endezeyê yên girêdayî hêzên hikumeta Sûriyê bi çavdêriya Nivîsgeha Têkiliyan a QSD`ê 42 cenaze ji gora komî ya duyemîn a li nêzî gundê Xefiye El-Wehib li navçeya Eyn Îsayê derxistin.

Her du gorên komî yên endamên tugeya 93 ku di havîna 2014`an de ji hêla DAIŞ`ê ve hatine qetilkirin in. Beriya vê 15 cenaze hatibûn derxistin. Bi vê yekê hejmara cenazeyên ku ji her du goran hatine derxistin gihaşt 57`an.

Nivîsgehê tevahiya cenazeyên ku ji her du goran hatine derxistin radestî hêzên hikumeta Sûriyê kirin. Bi armanca ku testên pêwîst li ser çêbikin û wan nas bikin da ku piştre radestî malbatên wan bikin.

Her du gorên komî li ser agahiyên şêniyên herêmên ku du gor li herêmê hene, di 31`ê Tebaxê de hatin dîtin. Gora yekemîn li gundê Firhaniyê bû û ya duyemîn li gundê Xefiye El-Wehib e. Her du gor jî nêzî hev in û tenê bi 2 kîlometran ji hev dûr in.

Li gundewarê navçeyê gelek gorên komî yên tugeya 93 hene. Lê heta niha tenê 4 hatine dîtin.

(şx)

ANHA

<iframe width="560" height="315" src="https://www.youtube.com/embed/vPfdMyJ4FGY" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>