Dermansazên Qamişlo konferansa xwe sêyemîn li dar xist

Bi beşdariya dermenfiroşên bajêr, Konferansa 3’yemîn a Yekitiya Dermansazên Qamişlo li hola Desteya Xweparastinê ya bajarê Qamişlo ya Bakur û Rojhilatê Sûriyê li dar ket.

Di konferansê de hevserokê Desteya Tenduristiyê ya Herêma Cizîrê Menal Mihemed, hevserokên TEV-DEM’ê Zelal Cîger û Xerîb Hiso amade bûn.

Konferans, bi amadekariya lidarxistina kongreyeke giştî ya Yekitiya Dermansazên Bakur û Rojhilatê Sûriyê ku dê di çend hefteyên pêş de li dar bikeve, li dar ket. Di konferansê de pirsgirêkên pîşeyî, astengî, dabînkirina dermanan û pêşkêşkirina ji gel re piştî bihabûna wan, hatin nîqaşkirin.

Hevseroka TEV-DEM’ê Zelal Cîger ji dermansazan re tevahî rewşên ku herêm tê re derbas dibe, nexasim hedefên artêşa Tirk a dagirker û berjewendiyên wê yên dagirkirina herêmên Bakur û Rojhilatê Sûriyê û mêtingeriya wê li tevahî Rojhilata Navîn, şîrove kirin.

Piştî axaftin bi dawî bûn, rapora salane ya Yekitiya Dermansazên Qamişlo hat xwendin.

Her wiha kongre bi pêşniyarkirin û pirsgirêkên li pêş beşa tenduristiyê û dîtina çareyan jê re berdewam e û piştre dê dengdayîna li ser hilbijartina meclisa rêveberiyê ya yekitiyê pêk bê.

Nêzî 700 dermanfiroş xwe di bin banê Yekitiya Dermasazan de bi rêxistin dikin û di bajarê Qamişlo de 207 dermanxane hene. Dê konferansên mîna vê li tevahî herêmên Bakur û Rojhilatê Sûriyê bên lidarxistin.

(fr)

ANHA