Şêniyên Bakur û Rojhilatê Sûriyê bang dikin ku “Artêşa Watanî ya Sûrî” bikeve lîsteya terorê

Pêkhateyên navçeya Tirbespiyê bang kirin ku çeteyên Artêşa Watanî ya Sûrî têkin lîsteyên terorê ya navneteweyî.

24 kanûn, 2019 08:17

QAMIŞLO-RÊNAS REMO

Di 30`ê Gulana 2017`an de avakirina “Artêşa Watanî ya Sûrî” li Tirkiyê hate ragihandin. Piraniya endamên wê ji bermahiyên DAIŞ û Cebhet El-Nusra ne. Pere, cabilxane û desteka lojistîk û istixbaratî ji Tirkiyê digirin. Artêşa Tirk a dagirker van çeteyan di êrişên xwe de li ser herêmên Bakur û Rojhilatê Sûriyê di 9`ê Cotmehê de bikar anîn.

“Artêşa Watanî ya Sûrî” sûcên şer li herêmên Bakur û Rojhilatê Sûriyê kirin. Jê qetilkirina sekretera giştî ya Partiya Pêşerojê ya Sûriyê Hevrîn Xelef tevî ajokar û parêzvanên wê di 12`ê Cotmehê de, lîstina koma El-Mecid di 23`ê Cotmehê de bi cenazeyê şervan Amara Rênas, darvekirinên meydanî li dijî sivîlan û talankirina milkên sivîlan.

Pêkhateyên navçeya Tirbespiyê li Bakur û Rojhilatê Sûriyê diyar kirin ku Artêşa Watanî ya Sûrî berdewama çeteyên DAIŞ`ê ne. Tirkiyê ji bo ku planên xwe yên dagirkerî wan çeteyan bikar tîne. Şêniyê bi nave Mihemed Yusif destnîşan kir ku Tirkiyê wan çeteyan bikar tîne û wiha domand: "Tirkiyê wan koman bikar tîne ji bo ku axa Sûriyê qut bike û tev li Tirkiyê bike. Erdogan wê wan bifroşe mîna ku li Heleb û Xûta kiriye."

Yusif bang li NY`î kir ku Artêşa Watanî ya Sûrî têkin lîsteya terora cîhanî.

Şêniyê bi navê Mistefa Xelef diyar kir ku binpêkirinên “Artêşa Watanî ya Sûrî û Artêşa Azad” ne li gorî navên wan in. Xelef got: “Dema welatparêziyê îdia dikin di bingehê de ne wisa ne. Azadiyê îdia dikin û ew ne azad in. gelê Sûriyê ji kirinên wan çeteyan dûr in.”

Xelef bang kir ku navên wan çeteyan bikevin lîsteya terorê ya cîhanî. Xelef got: “Ez ji bêdengiya civakî ya navneteweyî li hember binpêkirinên çeteyan ên ku zarokan dikujin, bi cenazeyan dilîzin û milkên şêniyan talan dikin re, şaş mame.”

Reid El-Sair teqez kir ku “Artêşa Watanî ya Sûrî” ji çeteyên DAIŞ û Cebhet El-Nusra pêk tê û wiha axivî: “Armanca wan parçekirina axa Sûriyê ye.” El-Sair banga hevgirtinê li dijî komên terorîst kir.

(şx)

ANHA