Zarokên şehîd Şivan: Bavo şiyar be me bêriya hemêza te kiriye

Cenazeyên şehîdên Berxwedana Rûmetê, Fermendarê Hêzên Antî Terorê Egîd Mehmûd (Tolhildan Zagros) ê ku di 20`ê Cotmehê de li navçeya Eyn Îsayê şehîd bûye, şervanê QSD‘ê Yûsif Nebî (Şivan Rohat) yê ku di 11`ê Cotmehê de li bajarê Serêkaniyê şehîd bûye, şervanê Hêzên Sûriye Demokratîk Behcet Anco (Cûdî Feraşîn) bi yê di 14`ê Cotmehê de li bajarê Serêkaniyê şehîd bûye îro bi merasîmeke girseyî li Goristana Şehîd Delîl Sarûxan a bajarê Qamişlo hatin veşartin.

Di merasîna dîmenê zarokên şehîd Şivan ku li rex cenazeyê bavê xwe rûniştibûn û bang li bavên xwe dikirin bala girseya gel kişand.

Şehîd Yûsif Nebo (Şivan Rohat) (40) bavê 7 zarokan bû (6 keçan û kurekî). Her du keçên wî Pêla û Lavîn li ber cenazeyê bavê xwe rûniştin û qêriyan. Her duyan bang li bavê xwe kirin: "Bavo şiyar be me bêriya te kir. Bavo bihêle em bikevin hemêza te. Ji vê textê derkeve û bihêle carekê em te hemêz bikin."  Girseya gel bi vê dimena bi êş bandor bûn û hêstir berandin.

Şehîd Şivan ji destpêka avabûna YPG`ê tev lê bibû, beşdarî gelek pêngavên rizgarkirina herêmên Bakur û Rojhilatê Sûriyê ji çeteyan bû, herî dawî di bersivdayîna êrişên artêşa Tirk a dagirker û çeteyên wê yên li ser herêmê de şehîd bû.

Di merasîna oxirkirinê de birayî şehîd Şivan, Hemdîn Nebî got şehîd Şivan piştî êrişa dewleta Tirk li ser herêmên Bakur û Rojhilatê Sûriyê pê re axiviye û wê demê li Serêkaniyê li rex hevalên xwe li ber xwe dida û wiha jê re gotibû: "Bira tu dixwazî em canê xwe feda bikin lê em zarokên Serêkaniyê bikin qurban û dest jê berdin. Wê demê min nizanî çi bersîv bidim. Tenê min got birayê min hûn parêzvanên zarokên gelê me ne. Bi derbasbûna dagirker û çeteyna ji axa me re jiyana zarokan namîne."

(şx)

ANHA