Li Helebê têkildarî komploya 9‘ê Cotmehê civînek hate lidarxistin

Meclisa giştî ya taxên Şêxmeqsûd û Eşrefiyê yên bajarê Helebê der barê komploya 9‘ê Cotmehê ya li dijî Rêber Abdullah Ocalan de civînek li dar xist.

Di civîne ku li hola civînana a beşê rojavayê taxa Şêxmeqsûdê hate li darxistin de bi dehan şênî û malbatên şehîdan amade bûn. Cihê civînê bi wêneyên Ocalan û şehîdan hatibû xemilandin.

Civîn bi deqeyeke rêzgirtin dest pê kir. Paşê endama Kongreya Star Rûbarîn Helebê qala komploya navdewletî ya li dijî Rêber Abdullah Ocalan kir û got: "Di 9‘ê Cotmeha 1998‘an de bi tevlêbûna hêzên hegemonîk ên kapitalist û dovikên wê yê netewperest komployek li dijî Rêber Ocalan pêk hat. Ev komplo bi derxistina Ocalan ji Sûriyê dest bi kir û bi girtina wî di 15‘an Sibata 1999‘an de bi encam bû. Komplo piştî derbasbûna 21 salekê hîna bi rêya girankirina tecrîdê berdewam e."

Rûbarîn di berdewama axaftina xwe de got: "Rêbertî tevî mercên tecrîdê hîna banga aştiyê dike û di peyama xwe ya dawî de diyar kir ku ew amade ye di demeke kin de pirsgirêkên Rojhilata Navîn bi giştî û Sûriyê bi taybet çareser bike, lê pergalên desthilatdar çareseriyê naxwazin da ku di berdewama alozî, şer û wêranê de qezenciyên mezin bi dest bixin. Ji ber vê yekê naxwazin Ocalan derkeve û pêşniyarên xwe yên çareseriyê pêşkêş bike."

Rûbarîn di dawiya axaftina xwe de komploya navdewletî û tecrîda li ser Ocalan şermezar kir û bang li gelên Rojhilatê Navîn û gelê Kurd kir ku li dijî tecrîdê têkoşînê mezin bikin.

ANHA