Pêşangeha "Bangewaziya Şarestaniyê" vê carê li Kobanê hate vekirin

Desteya Çand û Hunerê ya herêma Efrînê ji bo ku balê bikşîne ser binpêkirinên dagirkeriya Tirk û çeteyên wê yên li dijî dîrok û şûnwarên kantona Efrînê pêşangeheke wêneyan bi navê " Pangewaziya Şarestaniyê" organîze kir.

Pêşangeh piştî ku li kantona Şehba û Helebê hate vekirin, îro bi hevkariya Desteya Çand û Hunerê ya herêma Efrînê li navenda Çand û Hunerê ya Baqî Xido ya bajarê Kobanê hate vekirin.

Bi dehan şêniyên kantona Kobanê, şandeyek ji Rêveberiya Xweser a Bakur û Rojhilatê Sûriyê, nûnerên saziyên sivîl û partiyên siyasî serdana pêşangehê kirin.

Di pêşangehê de cîgirê Hevserokê Meclisa Rêveber a Bakur û Rojhilatê Sûriyê Hemdan El-Ebid axivî û got: "Efrîn xaka hezkirin û aştiyê ye, Efrîn sembola şarestanî û çanda gelên resen e, lê îro der heqê wê de binpêkirinên herî qirêj têne kirin, nasname û demografiya wê ji aliyê dagirkeriya Osmaniya nû ve tên qirkirin û dîrok û şûnwarên wê tên talankirin."

Hevserokê Desteya Çand û Hunerê ya Herêma Firatê Rêzan Nasan jî îşaret bi girîngiya vekirina vê pêşangehê kir û got: "Wekî tê zanîn xaka Efrînê bi kanzeyên dîrokî û şarestanî tijî ye, dewleta Tirk a dagirker û çeteyên wê li pêşberî çavên cîhanê şarestaniya wê talan dike û dirûxîne û hewl dide dîroka wê reş bike."

Hevseroka Gerînendeya Şûnwaran a herêma Efrînê Esmehan Ehmed jî ji aliyê xwe de ev tişt anî ziman "Dema em dibêjin Efrîn wekhevî, azadî û demokrasî tên bîra me. Efrînê dergûşa şarestaniyê ya resen e ji ber vê yekê ji aliyê dagirkeriya Tirk ve hate hedefkirin û niha jî deverên wê yên dîrokî tên talankirin."

Rêveberê Gerînendeya Şûnwaran a bajarê Efrînê Selah Sîno bi kurtasî qala deverên dîrokî yên Efrînê kir û got, deverên dîrokî niha ji aliyê dagirkeriya Tirk û çeteyên wê bi awayekî plankirî tên dizîn û talankirin.

Piştî axaftinan senevîzyonek li ser binpêkirinên dagirkeriya Tirk û çeteyên wê yên li dijî çand û şûnwarên Efrînê hate pêşandan.

ANHA