‘Tirkiyê dikeve ku derê bi xwe re wêranî û talanê tîne’

Şêniyên bajarê Qamişlo yê Bakur û Rojhilatê Sûriyê rola Tirkiyê di avakirina "herêma ewle" ya li ser sînorê di navbera herêmên Bakur û Rojhilatê Sûriyê û Bakurê Kurdistanê de red dike û diyar kir ku Rêveberiya Xweser parastina ewlehî û aramiya herêmên Bakur û Rojhilatê Sûriyê  kir û bi keda wê herêm tu carî mîna niha geştir nebûye.

Rayedarên Tirk dem bi dem daxuyaniyên êrîşkirina herêmên Bakur û Rojhilatê Sûriyê didin. Daxuyaniyên dawiyê jî yên wezîrê parastinê yê Tirkiyê Hulusî Akar ku li wîlayeta Erzincanê di dema serdana fermandariya artêşa sêyemîn a 26’ê Tebaxê de pêk aniye, hatin kirin.

Di vê çarçoveyê de Remedan Silêman (83) ji şêniyê bajarê Qamişlo anî ziman: "Tirkiye her tim dixwaze me tune bike û li ser me xetereyeke mezin e. Derbasbûna wê ya herêmê dê şêniyan neçarî koçberkirinê bike û dê herêm bikeve rewşeke kambax."

Remedan Silêman got: "Rêya yekane ya li hember gefên Tirkiyê ew e ku gel parastina yekitî û hevgirtina xwe bike. Da ku bibe dîwarekî qedexe ji pêkanîna dijminatiya Tirkiyê re."

JHesen Feysel ji şêniyên taxa Enteriyê ya bajar Qamişlo ye û wiha got: "Heke dewleta Tirk derbasî herêmên me yên ewle bû, dê ji nû ve bi xwe re DAIŞ’ê bîne, ji ber ku wê piştgiriya DAIŞ’ê dikir. Dê herêm bikeve nav tariyê û keraset li ser me pêk bê."

Feysel anî ziman ku Tirkiye li her cihê ku destwerdanê dike, wir wêran û talan dike û wiha pê de çû: "Tirkiye binpêkirinên talan, dizîn, revandin û serjêkirinê pêk tîne. Me kiryarên DAIŞ’ê û dewleta Tirk ku herêmên Bakurê Sûriyê dagir kirine, dîtin."

Hesen Feysel wiha bi dawî kir: "Pêdiviya me bi herêma ewle di bin çi navî de dibe bila bibe tune ye û ji herêma me ewletir tune ye. Heke Tirkiye destwerdanê li kar û barên hundirîn nekir, ev ewlehî û aramî zêdetir dibe."

(fr)

ANHA