Li Minbicê şehîdên meha Tîrmehê hatin biranîn

Şêniyên bajar û gundewarên Minbicê bi merasîmekê li goristana Şehîdan, şehîdên meha Tîrmehê bi bîr anîn. Dayik û hevjînên şehîdan di çarçoveya pêngava "Me yekitiya xwe ava kir..em biser ketin..em ê li ber xwe bidin da ku biparêzin..ji dagirkeriya Tirk re na"de ya bi armanca şermezarkirina gefên Tirkiyê yên li ser herêmên Bakur û Rojhilatê Sûriyê daxuyaniyek da.

Merasîm bi deqeyeke rêzgirtinê dest pê kir. Paşê endama Meclisa Malbatên Şehîdan Henadî El-Mihemed şehîdên meha Tîrmehê bi bîr anîn û got: "Şehîd mişeleya ku rêya me ronî dike û deryayek ji fedekariyê ne, gotin nîn in ku leheniya wan bînin ziman. Şehîdan berdêlên giran dane da ku em bi azadî bijîn."

Bi navê malbata şehîd Welîd El-Ceza, dayika wî Ferîde Qebanî jî axivî, spasiya Meclisa Leşkerî ya Minbicê û Meclisa Malbatên Şehîdan kir ku ji bo parastina gel ked dane. Ferîda soza şopandina xeta şehîdan da.

Piştî axaftinan, daxuyaniyek bi navê dayik û hevjînên şehîdan ji aliyê rêvebera Meclisa Malbatên Şehîdan Hesna El-Dahir dayika şehîd Mehmûd El-Îsa ve hate xwendin.

Di daxuyaniyê de hate gotin: "Bi navê dayik û hevjînên şehîdên ku ji bo ewlehî û aramiya welatê me xwîna xwe ya zelal dane em ji hemû jinan bi taybet dayik û hevjînên şehîdan hêvî dikin ku li ser xeta şehîdan bimeşin û armancên wan pêk bînin. Divê hemû jin ji bo rumeta zarokên xwe û jiyaneke bi rumet li hemberî her dijminekî sekina berxwedanê bisekinin."

Di daxuyaniyê de hate diyarkirin ku gefên Tirkiyê hîna bi dawî nebûne, armanca wê ew e ku deverên din ên xaka Sûriyê dagir bike û wiha hate domandin: "Armancên Tirkiyê wê pêk neyên. Em ê li hemberî van gefan bisekinin, çawa me zarokên me rêxistina terorîst a DAIŞ‘ê têk bikir û welatê me rizgar kir em ê li hemberî Tirkiyê bisekinin û xeta şehîdan xwe bişopînin."

Di dawiya merasîmê de şêniyan di nav berzkirina dirûşmeyan de find li ser gorên şehîdan pêxistin.

ANHA