Projeyên Şaredariya Dêrikê ji ber derfetên kêm dereng dimînin

Şaredariya Gel a Dêrikê bi hevkariya şîrketa Cûdî dest bi zîftkirina gelek kolanên bajarê Dêrikê û gundên wê kir. Her wiha pirên ku ji ber lehiyê di zivistanê de xirab bûbûn, sererast dike.

Projeyên Şaredariya Gel a Dêrikê ji ber kêmbûna madeyan û alavan dereng man.

Serokê Komîteya Fenî ya Şaredariya Gel Hesen Mihemed got: “5 projeyên sereke di nav planan de hebûn. Ji wan zîftkirina kolanên bajêr, taxa Rojava, taxa El-Tecnîd û taxa Sûkê hatin kirin. Lê taxên din ji sedî 40 pêk hatin. Sedema wê jî kêmbûna alava ku ziftê dirêj dike ye, ku niha li bajarokê Çilaxa û Girkê Legê dixebite.”

Mihemed wiha domand: "Şaredarî di projeya ziftkirina taxên mayî de dixebite. Kar di qelaştina rê û raxistina keviran li ser rêyên taxa El-Sîna, Tecnîd û Sûr didome."

‘Tevî derfetên kêm şaredarî di pêkanîna projeyên xwe de bi israr e’

Mihemed wiha got: "Sedema sereke di derengmayîna projeyan de, kêmbûna alavan û kêmbûna derfetên şîrketa Cûdî ye ku madeyên pêwîst pêşkêşî her çar navçeyên herêma Dêrikê Til Koçer, Çilaxa, Girkê Legê û navçeya Dêrikê dike."

Hesen destnîşan kir ku Şaredariya Gel di pêkanîna planên xwe yên pêşerojê de ku di sala 2019`an de danîbû, dixebite. Hesen wiha axivî: “Li gel vê jî ev xebat ruxmî kêmbûna alav û madeyan mîna kevirên hûr û madeya ziftkirinê, tên kirin.”

(jo/bm)

ANHA