Bi hemû hêza xwe xizmetguzeriya li gundewarên Dêrazorê baş dikin

Komîteya Xizmetguzerî û Şaredariyan a girêdayî Meclisa Sivîl a Dêrazorê di pêşêşkirina xizmetguzeriyê ji şêniyên gundewarên Dêrazorê re di nava liv û tevgerê de. Komîteyê di demên dawî de 40 stasyonên avê û 24 şaredarî ava kirin û sererast kirin, her wiha komîte hewl dide stasyonên avê û kanalîzsyonan li gelek herêmên gundewarên Dêrazorê sererast bike.

Xebatên ku komîteya Xizmetguzeriyê û Şaredariyan pêk anî

Der barê kar û xebatên komîteya Xizmetguzerî û Şaredariyan de, Hevserokê komîteyê Cîhad El-Licî diyar kir ku wan 40 stasyonên ava vexwarinê sererast kirin da ku pêwîstiya şêniyan ji avê pêk bînin û buhabûna ku şênî ji bo kirîna avê didin kêm bibe.

Komîteya Xizmetguzeriyê 24 şaredarî û navendên xizmetê vekirin, ew di jinûve sererastkirina cihên giştî û paqijkirina kolanan de dixebite.

Komîteyê rûxset da 50 firneyên taybet û mazot û ard bi buhaneyekî erzan da wan. Her wiha 16 firne ku milkiyeta wan li komîteyê vedigere vekirin û nan bi buhayê kêm dide gel.

Bi armanca rêxistinkirina tevgera çûn û hatinê li gundewarên Dêrazorê, komîteya Xizmetguzeriyê gelek gerac vekirin.

Di demsala zivistanê de ji ber lehiyê, hin ebareyên avê û piran li herêmên gundewarê Dêrazorê hatin rûxandin, komîteyê dehan ebare û pirên li gundewarê Dêrazorê sererast kirin da ku çûn û hatin li pêşiya şêniyan hêsan bibe.

Planên pêşerojê yên komîteyê

Bi armanca başkirina rewşa xizmetguzeriyê li herêmên gundewarê Dêrazorê ku nû ji çeteyên DAIŞ`ê hatin rizgarkirin, komîteyê milyar liryeyên sûrî veqetandiye, jê 500 milyon ji bo xizmetguzeriyê, 300 milyon ji bo projeyên ava gundewarê rojava û rojhilat, 100 milyon ji bo kanalîzsona li bajarokê El-Besîrê û Xiranîc li gundewarên rojhilat û projeyên biçûk, pereyên mayî jî ji bo projeyên xizmetguzeriyê yên din weke paqijiyê û hwd hatin diyarkirin.

Komîte hewl dide 5 stasyonên ava vexwarinê li herêmên cûda mîna El-Hermûşiyê, Kesrê, Cedîd Begarê, Xiranêc û Şihêl sererast bike.

Der barê zehmetiyên ku komîteya Xizmetguzerî û Şaredariyan a Meclisa Sivîl a Dêrazorê dikişîne, Hevserokê komîteyê Cîhad El-Licî got, kêmbûna kadroyên pîşeyî yên pispor kar asteng dike û wiha diyar kir: "Pêwîstiya me bi pisporên fenî ji endizyar û pîşeyan heye."

Hêjayî gotinê ye ku komîteya Xizmetguzerî û Şaredariyan dê di rojên pêş de, planên pêşerojê pêk bîne, di nav de projeya ziftkirina rêyan a li gundewarên Dêrazorê.

(jo)

ANHA