Malbatên şehîdan ên Kobanê banga bilindkirina asta çalakiyan kir

Li Efrîna dagirkirî dewleta Tirk û çeteyên wê kiryarên dermirovî û bêexlaqî ji revandin, kuştin û talankirina mal û milkan û siyasetên guhertina demografîk pêk tîne.

Di demên dawîn de, çeteyên Tirkiyê binpêkirinên xwe der heqê sivîlên Efrînê de zêde kirine. Çete sivîlan direvînin û li şûna wan peran dixwazin an jî bi awayekî hovane wan dikujin.

Der barê mijarê de endamê Rêveberiya Meclisa Malbatên Şehîdan a Kobanê Arif Balî der barê geşedanên dawîn ên li Efrînê û tedbîrên pêwîst ji bo rawestandina van binpêkirinan de axivî. Balî teqez kir ku civaka navneteweyî berpirsyariya van binpêkirinan radike û destnîşan kir ku bêdengiya li hember sûcan, hevkariya sûc e.

Balî wiha got: "Divê hemû gelê Kurd parastina şêniyên Efrînê ji erka xwe bibîne û serhildanan li dar bixe û bi hev re li hember van binpêkirinan bisekine."

Arif Balî teqez kir ku divê gelê Kurd li Kurdistanê û cîhanê dakeve kolanan û asta berteka xwe nîşan bide.

Di dawiyê de Balî bang li civaka navneteweyî kir ku bi erka xwe rabe û van binpêkirinên Tirkiyê bi dawî bikin, her wiha bang li gelê Kurdistanê kir ku di zûtirîn demê de tev bigere û asta têkoşînê bilind bikin.

(jo)

ANHA