Dîwarê dagirkerî li Efrînê lêdike, li Amûdê hate şermezarkirin

Girseya şêniyan wêneyên pitikên Efrînê yê di komkujiyên dewleta Tirk a dagirker û çeteyên wê de şehîd bûne bi nivîsên "Erdogan kujerê zarokan e", "Zarokên Efrînê rizgar bikin", "Qêrîna zarokên Efrînê bibihîzin" û "Na ji şerê li dijî zarokan re" û ji wê jî zêdetir pankartên bi nivîsên "Bimre dagirkeriya Tirk", "Bi vîna jinan em ê dagirkeriyê têk bibin", "Dagirkeriya Tirk...dagirkeriya dizî û talanê ye", "Meşa gelan li dijî dewleta Tirk e" û "Na ji dagirkeriya Tirk re", wêneyên şehîd Avesta Xabûr, alên YPG, YPJ, QSD û Kongreya Star hildan.

Meş ji pêş Qada Jina Azad a rojhilatê navçeya Amûdê destpê kir û di nava kolanên sereke yên navçeyê de dewam kir. Meşvaan diruşmên "Bijî berxwedana Efrînê"," Bijî Berxwdana Serdemê"," "Erdoganê, terorîst, kujer bimre"," Bajarê Efrînê yê efrîniyan e" û " dagirkerî dewam nake û şêniyên Efrînê dê vegerin" berz dikirin.

Girse li pêş Navenda Tevgera Ciwanên Şoreşger a Sûriyê li naverasta navçeya Amûdê sekinîn. Dûvre hevseroka Meclisa navçeya Amûdê Selwa Silêman axivî û diyar kir ku artêşa dagirkeriya Tirk û çeteyên wê siyaseta koçberkirinê û talankirinê dimeşînin û wiha domand: "Guhartina demografîk şahîdeya dîroka reş a dagirkeriya Tirk li Efrînê ye."

Selwa Silêman destnîşan kir ku kîna desthilata dagirkeriya Tirk li dijî Gelê Kurd gihaşt asta lêkirina dîwarê parçekirinê da ku Efrîn ji Sûriyeyê qut bike  û wiha got: " Tirkiyê hemû hevpeyman û qanûnên navdewletî li pêş çavên civaka nadewletî binpê dike."

Meş bi diruşmên şermezarkirina lêkirina dîwarê parçebûnê li derdora Efrînê û siyseta kiryarên li dijî şêniyên Efrînê bi dawî bû.

(fr)

ANHA