Xelatên Pêşbirka Şehîd Gerzan hatin dayîn

Yekitiya Rewşenbîran bi hevkariya Desteya Ciwan û Werzîşê û Komîteya Perwerdeya Civaka Demokratîk ya Kantona Efrînê (KPC-D) demek beriya niha Pêşbirga Şehîd Gerzan a Wêjeyî (helbest, çîrok, dariştin û gotar de bi zimanên Kurdî û Erebî) ragihandibû.

60 kes tev li pêşbirgê bû bûn.

Li gorî Komîteya Amadekar berhemên beşdaran ji hêla du komîteyan ji endamên Yekitiya Rewşenbîran a Kantona Efrînê ve hatin nirxandin. Komîteya  Kurdî ji Rûken Hesen û Miheydîn Erslan û zimanê Erebî ji Osama Ehmed û Zozan Mihemed pêk hatin.

Yekitiya Rewşenbîran vê êvarê ji bo eşkerekirina kesên di pêşbirkê de bi ser ketine şahiyek kampa Serdemê ya kantona Şehbayê li dar xist. Bi dehan şênî û hezkiriyên warê çandî tev li şahiya bûn.

Şahî bi deqeyek rêzgirtin destpê kir. Piştre sinevizyonek girêdayî pêşbirgê û amadekariyên wê hat pêşendan.

Di şahiyê de endama Yekitiya Rewşenbîran Zozan Mihemed axivî û rola ciwanan di civakê de destnîşan kir û got: "Ciwanên pêşeroj û hêviya civakê, ji ber ku ciwan bi xwe şoreş e. Bi pênûsên xwe fikrên xwe derbirandin. Bi têkoşîna xwe soza rizgarkirina Efrînê didin."

Her wiha hevseroka Desteya Ciwan û Werzîşê ya Kantona Efrînê Gulê Cemo axivî û rola ciwanan di xurtkirina çand û wêjeyê de silav kir.

Di şahiyê de Hemûde Ebdo û Ûsama Ehmed helbest vegotin.

Di dawiya şahiyê de navên kesên ku di pêşbirgê de bi serketine hatin ragihandin û xelat hatin dayîn. Kesên ku di beşa helbesta de bi zimanê Kurd bi serketine ev in; Cemîl Xoce, Xelîl Musa û Cemîle Mihemed. Beşa kurteçîrok Lewend Hec Yûsif.

Bi zimanê Erebî beşa kurteçîrok Mîrzan Bekir û Loran Hesen. Beşê dariştin Mîdye Osman.

Girêdayî heman mijarê hevserokê Yekitiya Rewşenbîran ê Kantona Efrînê Osama Ehmed ji ajansa me re axivî û destnîşan kir ku armanca wan ji pêşbirgê teşwîqkirina çîna ciwanan a ku di warê wêjeyê de serkeftî ye. Ehmed pesna asta wêjeyî ya berhemên beşdaran da.

Ciwanê bi navê Loran Hesen ê ku di beşa kurteçîrokê de bi zimanê Erebî bi serketiye got: "Min xwest bi pênûsa xwe mîna bi sed hezaran efrîniyan li ber xwe bidim. Min çîrokek bi zimanê Erebî bi navê Hesad(hilberîn) nivîsand. Di demên pêş de ez ê bi zimanê dayika xwe Kurdî binivîsim."

(şx)
ANHA