Ciwanên Tebqayê li ser berdewama berxwedanê teqez dikin

Çalakiya Meclisa Ciwanên Tebqa û Yekitiya Jinên Ciwan li herêma Tebqayê di roja 8`emîn de didome. Konê çalakiyê li pêşiya navenda ciwanan bi armanca şermezarkirina binpêkirinên dewleta Tirk a dagirker li Efrînê û helwldanên wê yên parçekirina Efrînê ji xaka Sûriyê, hatiye vedan.

Di bin konê çalakiyê de hevseroka Meclisa Ciwanên Tebqayê Rehma Hecî ji ajansa me ANHA`yê re axivî. Rehma tekez kir ku ew ê li hember faşîzma Tirkiyê ku dixwaze welatê wan parçe bike û sûcên li dijî sivîlan pêk tîne, çalakiya xwe berdewam bikin.

Dewleta Tirk a dagirker li herêmên Sûriyê ku dagir kiriye sûcên dermirovî ji kuştin, îşkencekirin û diziyê pêk tîne. Her wiha siyaseta tirkkirinê û guhertina demografiya herêmê didomîne.

Li Efrînê jî dewleta Tirk a dagirker beriya çend hefteyan dîwarê parçekirinê lê dike da ku Efrînê ji xaka Sûriyê qut bike.

Endama Yekitiya Jinên Ciwan a Tebqayê Xedîce Şaîb hewldanên dewleta Tirk ku Efrînê ji xaka Sûriyê qut bike, şermezar kir û teqez kir ku ew ê çalakî û xwepêşandanên xwe heta derxistina dewleta Tirk ji tevahî xakên ku dagir kirine, berdewam bikin.

Her wiha ji rêveberên Yekitiya Jinên Ciwan a Tebqayê Letîfa Elî bêdengiya navdewletî der bare kiryar û binpêkirinên dewleta Tirk a dagirker li Efrînê, şermezar kir. Letîfa destnîşan kir ku çalakiya wan di roja 8`emîn de didome û ne roja destpêkê û ne jî ya dawî ye.

Endamê Meclisa Ciwanên Tebqayê Ehmed Şêwax jî wiha axivî: "Ev roja 8`emîn e ku em çalakiya xwe dewam dikin. Em dagirkeriya Tirkiyê ji Efrînê re red dikin û em tu carî qebûl nakin ku senaryoya Lîwa Iskenderon careke din dubare bibe."

Ehmed Şêwaz teqez kir ku divê li dijî dewleta Tirk a dagirker berxwedan were kirin û wiha dawî li axaftina xwe anî: "Divê lêkirina dîwarê parçekinê were sekinandin."

(bx)

ANHA