Ciwanên Girê Spî piştgiriya grevên birçîbûnê dikin

Çalakî li kolana El-Bewabe El-Qedîme, bi beşdariya bi dehan ciwanan lidar ket. Ciwanan wêneyên Rêberê Gelê Kurd Abdullah Ocalan û parlamenter Leyla Guven a ku pêşengiya pêngava greva birçîbûnê dike, hildan. 

Di çalakiyê de endamê Tevgera Ciwanên Şoreşger ê Sûriyê Mihemed Girê Spî daxuyaniya tevgerê xwend.

Daxuyanî wiha ye;

“Wek ciwanên şoreşger ên kantona Girê Spî em ji dagirkeriya Tirk re teqez dikin ku em ê piştgiriya berxwedana grevên birçîbûnê yên li girtîgehan û yên ji derve bikin. Çalakî û têkoşîna me heya pêkanîna daxwazên girtiyan dê berdewam bin.

Herêmên Bakur û Rojhilatê Sûriyê yek beden e. Her êrîşek li dijî her herêmekê êrîşa li ser me hamûyan e. Em ê bi yekrêzî li dijî binpêkirinan bisekinin. Îro bi riya çalakiya xwe  em ji dagirkeriya Tirk re dibêjin, ji bo rizgarkirina tevahiya xaka Sûriyê ji dagrikiriya we, em ê heya dilopa xwîna xwe ya dawî liber xwe bidin.`

Çalakî di roja xwe ya destpêkê de bi berzkirina dirûşmeyên silavkirina berxwedana çalakgeran bi dawî bû.

Tevgera Ciwanên Şoreşger a Sûriyê dê çalakiyên xwe li kantona Girê Spî di rojên pêşiya me de berdewam bike.

(şx)

ANHA