Desteya Çandê lêkirina dîwarê li dora Efrînê, şermezar kir

Piştî çend rojan ji dagirkeriya Tirkiyê ji avakirina dîwaran li dora kantona Efrînê da ku serweriya xaka xwe berfirehtir bike, bertekên şermezarkirina van kiryaran zêdetir bûn.

Desteya Çand û Hunerê ya Herêma Firatê îro daxuyaniyek li pêşiya Navenda Çandê ya Kobanê bi zimanên erebî û kurdî da û kiryarên dewleta Tirk a dagirker şermezar kirin. Daxuyanî ji aliyê hevserokên desteyê Rêzan Nasan û Zîlan Hemo ve hate xwendin.

Daxuyanî wiha ye:

"Ji 18’ê Adara 2018’an ve dewleta Tirk kantona Efrînê ya Sûriyê dagir kir û hê jî dagir kiriye. Tê zanîn ku dewleta Tirk a dagirker ku bi komên çete re hevkar e, bi kiryarên dermirovî rabû, ne tenê li dijî şêniyên Efrînê, her wiha li dijî xwezayê jî şewat û wêrankirin pêk anîn. Her wiha di vê dema dawîn de jî dewleta dagirker a Tirk dest bi avakirina dîwaran kir ku dê Efrînê ji xaka Sûriyê qut bike.

Li ser vî esasî em bi navê Desteya Çand û Hunerê ya Herêma Firatê van kiryarên hovane şermezar dikin û şêwazên dewleta dagirker a Tirk red dikin, her wiha bang li raya giştî dikin ku kiryarên Tirkiyê yên dermirovî rawestîne, ji ber ku armanca van kiryaran avakirina Împaratoriya Osmanî ser hesabê nirxên gelan e û pêkanîna êrîşên hovane ye.

Di dawiyê de em dengê xwe ji bo têkoşîna şêniyên Efrînê bilind dikin û wiha dibêjin; na ji dagirkeriya Tirkiyê ser xaka Sûriyê re, na ji kiryarên hovana yên dermirovî re, na ji faşîzma Erdoganê terorîst re. Ew ê Sûriya hevgirtî bimîne û em ê rê nadin parçekirinê."

(eh)

ANHA