Li Hesekê damezradina Partiya Pêşerojê ya Sûriyê hat pîrozkirin

 Keleha Aştiyê ya bajarê Hesekê şahiyek li dar xist.

Partiya Pêşerojê ya Sûriyê salvegera yekemîn damezrandina partiyê bi dirûşmeya `Pirrengî, demokratîk û nenavenedîbûnê` li Hesekî pîroz kir. Şahî li hola Kelha Aştiyê ya Hesekê hat lidarxistin. Şandeyek ji Rêveberiya Xweseriya Demokratîk, Meclisa Rûspiyên Bakur û Rojhilatê Sûriyê, partiyên siyasî, endamên saziyên civaka sivîl û Hêzên Sûriyê Demokratîk beşdarî şahiyê bûn.

Cihê şahiyê bi pankartên`Jin bi mereqdariyek mezin hewl dide bi rêya avakirina civakê azadiya xwe di Sûriyeya pêşerojê de misoger bike`, `Sûriya pêşerojê şoreşa li dijî zordestan û terorê ye`, `Partiya Pêşerojê ya Sûriyê ji bo destpêkek bi hêvî bernameyek rast e`, wêneyên şehîdan hate xemilandin.

Şahî bi deqeyek rêzgirtin destpê kir, paşê serokê Partiya Pêşerojê ya Sûriyê Ibrahîm El-Qeftan axivî û salvegera yekemîn a damezirandina partiyê pîroz kir. El-Qeftan  diyar kir ku di encama aloziyên Sûriyê de û şerên ku rû dane, binesaziyê Sûriyê bi temamî wêran bû, bi hezaran gelê Sûriyê warên xwe berdan û koçber bûn.

El-Qeftan tekez kir ku Partiya Pêşerojê ya Sûriyê ji bo bicihanîna daxwaz û hêviyên gel ava bûye û wiha got: “Partiya Pêşerojê ya Sûriyê beyî hevgirtina gelê Sûriyê û baweriya wan bi Sûriyeyek pirrengî, demokratîk û nenavendî nikare bibe xilasiya gelê Sûriyê.”

Piştî bidawîbûna axaftinan peyamên pîrozkirinê yên Fermendariya Giştî ya QSD`ê, Meclisa Êlên Kurdî û Erebî, saziyên civaka sivîl û partiyên siyasî hatin xwendin.

Şahî bi gerandina xelekên govendê bi dawî bû.

(şx)

ANHA