Sersaxî ji malbata şehîd Avrîn Amanos re hat xwestin

ŞEHBA

Bi sedan şêniyên Efrîn û Şehbayê berê xwe da konê sersaxiyê yê şehîd Avrîn Amanos (Eliya Erneb) ku 8`ê Adarê dema erka xwe ya leşkerî pêk dianî, li bajarê Qamişlo şehîd bû û sersaxî ji malbata wê re xwest. Konê sersaxiyê li Kampa Serdem a kantona Şehbayê hatiye vedan.

Di bin konê sersaxiyê de wêneyên şehîdên YPJ/YPG`ê, ala Meclisa Malbatên Şehîdan û wêneyên Rêberê Gelê Kurd Abdullah Ocalan hatin daliqandin.

Merasîma sersaxiyê bi rêzgirtinê dest pê kir. Paşê ji rêveberên Meclisa Malbatên Şehîdan Ednan Şêx Mihemed û ji rêveberên Meclisa kantona Şehbayê Îsmaîl Mûsa, yek ji rêveberên Meclisa Kantona Efrînê Şêrîn Hesen, ji rêveberên Meclisa Herêma Efrînê Silêman Cafer û dayika şehîd Avrîn Amanos Leyla Erneb axivîn.

Di axaftinan de sersaxî ji malbata şehîd Avrîn Amanos re hate xwestin û îşaret bi rola şehîdan di parastina destkeftiyên şoreşa Rojava û Bakurê Sûriyê de hate kirin.

Her wiha di axaftinan de hate gotin ku wekî ku çawa şehîdan soza xwe pêk anî, divê gel jî ji bo wefedariya bi şehîdan re û Ocalan re her tim şopdarên rêya wan be û armancên wan pêk bîne.

Her wiha hat destnîşankirin ku wekî ku çawa Kawayê Hesinkar agirê azadiyê pê xist û li dijî dîktatoriyê serî hilda û wiha hate gotin: "Em ê jî agirê xwe pêxin û faşîzma Tirkiyê tune bikin. Ev soza ku me daye û em tu carî jê venagerin. Her ku berdêla wê çi be jî em ê Efrînê ji artêşa Tirk a dagirker û çeteyên wê rizgar bikin, em ê bi ser bikevin û li warê xwe vegerin."

Paşê wesîqeta şehadetê ji aliyê endama KPC-Demokratîk Şêrîn Hemo ve hate xwendin û radestî malbata şehîd hat kirin. Merasîma sersaxiyê bi dirûşmên “Şehîd namirin” bi dawî bû.

(bx)

ANHA