Spas QSD!

Dayikên şehîdan ên navçeya Dirbêsiyê spasiya QSD'ê kirin ku çeteyên DAIŞ'ê şikandin û tola zarokên wan hildan.

20 adar, 2019 10:04

OLVA HAC MENSÛR / HESEKÊ

DAIŞ a ku xeteriyeke mezine ji bo hemû cîhanê, niha di bargeha xwe ya dawî ya Baxozê de ber bi têkçûnê ve diçe. QSD derbeyên giran li çeteyên DAIŞ’ê dixe û şer berdewam e.

Li ser vê mijarê dayikên şehîdan ên navçeya Dirbêsiyê bi rêya ajansa me, hestên xwe yên kêfxweşiyê anîn ziman.

Dayika şehîd Kemal, Şemsa Ehmed got: "Em bê sebir mabûn, li benda roja têkçûna DAIŞ bûn. Bi vê yekê Hêzên Sûriyeya Demokratîk soza dabûn şehîdan girtin û tola zarokên me hildan.”

Dayika Şemsa, destnîşan kir ku cîhan şahidê lehengî û serkeftinên QSD'ê yên li dijî rêxistinên terorîst e û wiha got: “Roja ragihandina serkeftina li dijî DAIŞ'ê, ji bo malbatên şehîdan ên ku zarokên wan di pêngavên li dijî DAIŞ'ê şehîd bûne, keyfxweşiya herî mezin e.”

Dayika şehîd Memo, Fedîla Şêxo jî got: “Em ê li hemberî hêzên ku destdirêjî xaka me dikin, bisekinin. Em amadene ji bo parastina xaka xwe berdêlên giran bidin.”

(şx)

ANHA