QSD’ê dewreyeke nû li Tebqayê bi dawî kir

TEBQA

Merasîma bidawîkirina dewreya 5’emîn a bi navê ‘Dewreya Şehîd Mehmûd Reqa’ li bajarokê El-Bûasî yê ku dikeve bejahiya herêma rojava ya Tebqayê bi beşdarbûna hejmarek ji fermandariyên leşkerî û saziyên sivîl û civakî, hate lidarxistin.

Di merasîmê de, hevserokê Meclisa Zagonsaz Hamid Ferec, hevserokê Meclisa Rêveber Şiyar Mihemed, ji fermandarên QSD’ê Omîd Gabar û rûspiyên êlên erebî yên herêmê amade bûn.

Merasîmê bi toraneke leşkerî dest pê kir. Dûre hevserokê Komîteya Parastin û Erka Xweparastinê Mihemed Elî Xalid bidawîkirina dewreya leşkerî pîroz kir û wiha got: "Îro bi rasthatina şerê hêzên me li dijî tunekirina terorê û rizgarkirina Bakur û Rojhilatê Sûriyê ji qirêjiya wê, ciwanên herêmê di nava Hêzên Sûriya Demokratîk (QSD) de ku ji tevahî gelên Bakur û Rojhilatê Sûriyê pêk tê, xwe bi rêxistin dikin."

Di dawiyê de Xalid wiha got: "Hûn niha berpirsyarên ewlehiyê ne û divê li ser şopa hevalên xwe yên şehîd bimeşin."

Dewreya Şehîd Mehmûd Reqa yê ku şervanên herêmên Reqa, Tebqa û Dêrazorê tev lê bûne 45 rojan dom kir. Şervanan waneyên bîrdozî û leşkerî standin.

Piştre şervanan sonda leşkerî xwar û soza parastina destkeftiyên Bakur û Rojhilatê Sûriyê da ku bi xwîna şehîdan hatiye bidestxistin û tekez kir ku têkoşîn û berxwedan metoda wan a jiyanî ye. Di dawiya merasîmê de şervanan dîlanên erebî û kurdî gerandin.

Hêjayî bibîrxistinê ye ku şehîd Mehmûd Reqa di pêngava Bagera Cizîrê şehîd bûbû.

(fr)

ANHA