Piştî 14 salan li Serêkaniyê du malbat li hev hatin

HESEKÊ

Beriya niha bi 14 salan, kesek ji malbata Beko Xelîl a ji eşîra El-Foqiyan, kesekî ji malbata Welîd Şêxo yê ji eşîra Şêxo kuşt. Paşê, kesekî ji malbata Welîd Şêxo kesek ji eşîra El-Foqiyan kuşt. Ji bo çareserkirina vê pirsgirêkê, Komîteya Lihevanîn û Edaleta Civakî ya Meclisa bajarê Serêkaniyê ya kantona Hesekê û MSD`ê pirsgirêka di navbera her du malbatan de çareser kir û ew li hev anîn.

Îro li Navenda Gumrikê ya Serêkaniyê merasîma lihevanîna her du malbatan pêk hat.

MSD, Rêveberiya Xweser a Bakur û Rojhilatê Sûriyê, Meclisa Kantona Hesekê û ya Serêkaniyê, rûspiyên eşîrên Kurd û Ereb ên herêmê, nûnerên TEV-DEM, Buroya Têkiliyên Giştî ya QSD`ê û her du malbat tev li merasîmê bûn.

Di merasîmê de, Mihemed El-Qadirî bi navê Buroya Oldaran a Herêma Cizîrê, rêveberê Komîteya Lihevanîn û Edaleta Civakî ya Serêkaniyê Eytan Derwîş, endamê buroya QSD`ê Hemed El-Şehade, endamê Komîteya Lihevanînê ya Herêma Cizîrê Nûredîn Şakir û endama Koordînasyona TEV-DEM`ê Medya Mihemed axivîn.

Di axaftinan de rola her du malbatan di çareserkirina pirsgirêkê de û israra rêgeza biratî û hezkirinê di navbera wan de, hate gotin. Her wiha lihevanîn hate pîrozkirin û hate hêvîkirin ku ev bibe destpêka çareserkirina pirsgirêkan.

Piştre, nameya Nûnertiya Rêveberiya Xweseriya Demokratîk a Başûrê Kurdistanê û Hevserokatiya Meclisa Serêkaniyê hate xwendin û di nameyan de lihevanîn hate pîrozkirin.

Piştre her du malbat li hev hatin û pirsgirêk hate çareserkirin.

(kc)

ANHA