Şehîdên Erka Xweparastinê bi merasîmekê girseyî hatin veşartin

DÊRAZOR

Şêniyên bajarokê Bisêra û gundên wê cenazeyê şervanên Hêzên Erka Xweparastinê Mihemed Nayîf El-Hemed, Ehmed Casim El-Hisên û Fûad Hirêş ku 9‘ê Sibatê de di Pêngava Bagera Cizîrê de şehîd bibû li Goristana Şehîd Hanî El-Hesen oxir kirin.

Merasîm bi deqeyeke rêzgirtin û torana leşkerî ji aliyê şervanên Hêzên Erka Xweparastinê ve destpê kir.

Ji fermandarên Hêzên Erka Xweparastinê Demhat Tirbespiyê axivî û sersaxî ji malbatên şehîdan re xwest û got: "Em bejna xwe li ber giyanên şehîdên leheng ditewînin, şehîd mişeleya têkoşîn û berxwedanê ne, bi saya fedekariya wan terora DAIŞ‘ê têk diçe û warê me jî tarîtiyê ronî dibe."

Bi navê Meclisa Malbatên Şehîdan endama meclisê Suha Mihemed jî axivî û got: "Şehîd sembola fedayîtiyê ne, ji bo jiyaneke bi azad û rûmet giyanên xwe feda kirin û wê hertim di bîra me de bin."

Endama Meclisa Malbatên Şehîdan Sabirîn Mihemed nasnameyên şehîdan xwend û radestî malbatên wan kirin. Her wiha nasnameya şervanên Hêzên Erka Xweparastinê Ebdulhemîd Tebhan, Abdullah El-Mutleg, Malik Salih, Ebdulqadir El-Elî û Ebdulrezaq El-Tamê ku di 19‘ê Sibatê de û endamê Hêzên Ewlekariya Hundirîn Mihemed Emîn El-Hemada ku 26‘ê Mijdara 2018‘an de di Şerê Tinekirina Terorê de şehîd bibûn eşkere kir.

Cenzeyê her sê şehîdan di nava dirûşme û tilîliyên dayikan hatin veşartin.

ANHA