Li gundên bakurê Minbicê kiryarên çeteyan zêde dibin

ŞERÎF EL-ABO / MINBIC

Xuya ye ku dengeya kiryarên Tirkiyeyê û çeteyên wê li ser gundên bakurê Minbicê zêde bûye. Bi tabyet piştî ku dewriyeyên hevpar di navbera Tirkiye û Amerîkayê de li ser xetên çemê El-Sicûr ê di navbera Hêzên Meclisa Leşkerî ya Minbicê û çeteyên Tirkiyeyê de.

Di meha çûyî de hêzên Koalîsyonê dewriyeyên hevpar bi Tirkiyeyê re li herêmên di navbera Meclisa Leşkerî û çeteyên Tirkiyeyê de li bakurê Minbicê meşandin, heta niha 4 dewriyeyên hevpar derketine.

Şeva derbasbûyî li gundên bakurê bajarê Minbicê 12 noqteyên Hêzên Meclisa Leşkerî ya Minbicê (Un El-Dadat, El-Hiloncî, El-Mehsenlî, Toxar El-Kebîr, El-Refîa, Ereb Hesen û Um Cilûd) hatin hedefgirtin. Çeteyên dagirkeriya Tirkiyeyê çekên giran bi kar anîn.

Şervanên Meclisa Leşkerî ya Minbicê diyar kir ku li nêzî xetên di navbera wan û çeteyên Tirkiyeyê de dengê wesayîtên leşkerî bihîstin û diyar kir ku tu zirar pêk nehatiye.

Yek ji şervanên Meclisa Leşkerî ya Minbicê Hikmet El-Hacî axivî û wiha got: "Şeva derbasbûyî êrîşek li ser noqteya me hat, me jî bersiv da, şer seat di 5’ê êvarê dest pê kir heta 2’yê şevê dewam kir, çeteyan bi çekên sivik û giran êrîş kirin."

Der barê mijarê de şervanê bi navê Qehreman Minbic jî axivî û wiha got: "Me bersiva wan da û parastina sivîlan kir û em ê heta dawiyê parastinê bikin."

Gelek gundên bakurê Minbicê ku xeta di navbera Meclisa Leşkerî ya Minbicê û dagirkeriya Tirkiyeyê de, di hefteyên çûyî de rastî gelek êrîşan hatin û şervanên meclisê parastina wan deveran kir.

(jo)

ANHA