Ruxmî astengdariyê çeteyên DAIŞ’ê bi sîxuriyê tawanbar kirin!

TELAL HISÊN / HESEKÊ

Ruxmî xizantiyê û astengdariyê ciwanê 31 salî yê ji gundê Elwa Şemsan yê girêdayî bajarokê Mergedê yê kantona Hesekê li Bakurê Sûriyeyê bi navê Raêd Elî El-Nehar bi vîneke xurt dijî. El-Nehar ji astengdariyê re teslîm nebû, lê belê gewretirîn kiliyên jiyanê bi giyana daxwazker û karker ji bo peydakirina debarê xwe jiya.

Raêd El-Nehar beriya ku astengdar bibe, ajokar bû. Debara malbata xwe û lêçûna xwendinê jê peyda dikir. El-Nehar qezayek derbas kir. Di encamê de tevgera her du lingên xwe winda kir. Pêwîstiya wî ji bo dermankirin hebû. Lê ji ber lêçûna wê bi buhaya 5 milyon lîreyên Sûriyeyê di wê demê de û ji ber rewşa madî ya dijwar El-Nehar astengdar ma.

Bi hevkariya hevalên xwe vegerî jiyana normal û motorsîklêtek kirî da ku ji mal derkeve û bêhna xwe vede.

Raêd El-Nehar bi motorsîklêtê bi sed kîlmetreyan ji bajarokê diçû bajarê Hesekê. Di dema serweriya DAIŞ'ê li herêmê de, rojekê çeteyan ew rawestand û bi hinceta ku ew ajanê QSD'ê ye girt, îşkence lê kirin û her du lingên wî yên felcbûyî şikandin. Piştre bêyî derman bikin ew radestî malbata wî kirin.

El-Nehar destnîşan kir ku rêxistinên mirovî yên ku soza kursiyekî dabûn wî, heta niha soza xwe bi cih neanîne û wiha domand: "Kursiya ku niha ez bi kar tînim, ya pîrekê ye ku beriya vê wefat kiriye. Hema ez xwe pê îdare dikim."

Raêd El-Nehar bang li aliyên têkildarî kesên astengdar kir ku alîkariya wî bikin da ku kursiyekî bikire yan jî emeliyekê ku tê payîn wî ji vê rewşê xilas bike, bikin û bi bîr xist ku lêçûna emeliyê pir e û tu kes nikare alîkariya wî bike. Ji ber wê jî heta niha di vê rewşê de ma ye.

(şx)

ANHA