Ji bo parastina xwe dîwar ava kirin

RÊNAS REMO-KADAR IBRAHÎM/QAMIŞLO

Bi dehan gundên girêdayî navçeya Tirbespiyê ya kantona Cizîrê li Bakurê Sûriyeyê, li ser sînorên di navbera Rojava û Bakurê Kurdistanê de ne. Ev gund di van 2 salên dawîn de rastî dijwartirîn êrîşên dewleta tirk hatine ,berhemên çandiniyê yên şêniyan şewitandine û destûr nedan ku şivan şivantiyê bikin.

Leşkerên artêşa tirk ji destpêka Tîrmehê ve, zevî û berhemên çandiniyê yên şêniyên gundê Kêl Hesnak û herêma Cihreh şewitandin û di 7 Tîrmehê de şivan hedef girtin.

Binpêkirinên artêşa tirk ên herî dawî der heqê şêniyên navçeya Tirbespiyê de, bûye cihê tirs û xofa şêniyan û bi taybet zarokan.

Welatiya bi navê Meleke Mihemed Melek a ji gundê Kêl Hesnak yê 1 km ji sînor dûr e û 15 km li bakurê rojhilatê navçeya Tirbespiyê ye, xuya kir ku di van 3 mehên dawîn de leşkerên artêşa tirk rojane di nîvê şevê de, gule bê ser û ber li ser gund berdidan û her wiha gogên sojer diavêtin nav zevî û berhemên şêniyên gund.

Di nav bêdengiya navdewletî de û ji bo parastina xwe, şêniyên van gundan dîwar li ber deriyên malên xwe ava kirin. 

Welatiya bi navê Eyşe Mecîd a ji gundê Kerdîm nêzî sînorê ye, diyar kir ku di van salên dawîn de bi awayekî dijwar hatine hedefgirtin û wiha pê de çû: "Tirkiye ji qanûnên navdewletî û sînorên cîranan re rêzê nagire. Mirov, lawir û heta erdên çandiniyê topbaran dike."

Eyşe xuya kir ku artêşa tirk malên sivîlan bi armanca valakirina gundan ji niştecihên resen topbaran dike.

(şx/ew)

ANHA