Têkildarî komploya 15’ê Sibatê civînek hat lidarxistin

Di çarçoveya çalakiyên bi munasebeta komploya navneteweyî ya 15’ê Sibatê ya li dijî Rêber Abdullah Ocalan de,  Însiyatîfa Sûriyeyê ya Azadiya Rêber Abdullah Ocalan civîneke girseyî li dar xist. Civîn bi hevkariya Meclisa Sivîl a Kantona Tebqayê li Hola Şehîd Musena Ebdulkerîm a Navenda Çand û Hunerê pêk hat. Bi dehan şêniyên herêmê, nûnerên Rêveberiya Sivîl a Demokratîk, partiyên siyasî, endamên Kombûna Jinan a Zenûbiya û meclis û komînên kantonê beşdarî civînê bûn.

Piştî deqeya rêzgirtinê hevserokê Meclisa Sivîl a Kantona Tebqayê Hemûd El Rehîl bal kişand ser felsefeya Rêber Abdullah Ocalan û diyar kir ku Rêber Abdullah Ocalan banga avakirina civakeke exlaq û polîtîk dike.

Berdevka Însiyatîfa Sûriyeyê ya Azadiya Rêber Abdullah Ocalan a Tebqayê Şeza El Hisên jî armanca pêngava navneteweyî ya ji bo azadiya fîzîkî ya Rêber Abdullah Ocalan û çareserkirina pirsgirêka Kurd vegot.

Di civînê de şêwirmendê Rêveberiya Sivîl a Demokratîk a Kantona Tebqayê Mezlûm Yûsif qala komploya navneteweyî ya li dijî Rêber Abdullah Ocalan û diyar kir ku  dewletên ku beşdarî komployê bûne wekî Îsraîl, DYA, Yewnanistan û Tirkiyeyê şerê ramanên Rêber Abdullah Ocalan dikin. Her wiha anî ziman ku ramanên Rêber Abdullah Ocalan li dijî fikrê kapîtalîzmê ye yê ku şerê gelan dike.

Di dawiya civînê de sînevîzyonek li ser komploya navneteweyî, raperîna gel a li hemberî komployê û çalakiyên bi banga azadiya fîzîkî ya Rêber Abdullah Ocalan hat pêşandan.

(bb)

ANHA