Soza tolhildana şehîd Sakîne Cansiz û hevrêyên wê hat dayîn

Li navçeya Til Temirê Kongra Star civînek li hola Meclisa Malbatên Şehîdan li dar xist, tê de bi dehan endamên saziyên civaka sivîl û nûnerên partiyên siyasî û şêniyên navçeyê beşdar bûn.

Di serî de rêvebera Kongra Star a navçeyê Hêvîn Sebrî got: "Em derbasî sala 11'emîn a şehadeta hevrêyên me Sara, Rojîn û Ronahî bûn, ev jî ji sûcên herî qirêj ên li dijî têkoşerên Kurd li Ewropayê ye, ew têkoşerên ku xwe ji bo xizmeta doza gelê Kurd û ya gelên azadîxwaz feda kirine. Têkoşîna şehîd Sakîne ne tenê ji bo gelê Kurd, lê belê ji bo hemû gelên azadîxwaz bû."

Piştre 2 helbest ji aliyê endama Navenda Çand û Hunerê helbestvan Nalîn Yûsif ve li ser şehîd Sakîne û têkoşîna xwe hat xwendin û civîn bi pêşandana sînevîzyonek li ser jiyana şehîd Sakîne Cansiz bi dawî bû.

Li Hesekê semînerek li navenda Kongra Star a taxa Neşwe ya bajarê Hesekê li dar ket, tê de bi dehan jin û endamên saziyan beşdar bûn.

Di serî de sînevîzyonek li ser jiyana hersê têkoşeran Sakîne, Leyla û Fîdan hat pêşandan, piştre endama Akademiya Zanistên Civakî ya Rêber Abdullah Ocalan, Evîndar Mustefa got: "Şehîd Sakîne ji bo xelasiya jinên bindest ji zilmê çira bû."

QAMIŞLO

Kongra Star semînerek li hola Navenda Çand û Hunerê ya navçeya Til Hemîs a kantona Cizîrê li dar xist, tê de endamên saziyên sivîl û meclisan û endamên Kongra Star beşdar bûn.

Endama Kongra Star a Til Hemîs bi kurtasî behsa jiyana hersê şehîdan kir û di dawiyê de sînevîzyonek li ser jiyana wan hat pêşandan.

Şêniyên navçeya Amûdê ya kantona Cizîrê jî bu sînevîzyonekê hersê şehîdên têkoşer bi bîr anîn, di çalakiyê de bi dehan şêniyên navçeyê û bajarok û gundên wê, endamên saziyên sivîl û meclisan û nûnerên partiyên siyasî û Kongra Star li navenda kongrê beşdar bûn.

KOBANÊ

Di heman çarçoveyê de, Kongra Star kantona Girê Spî bi sînevîzyonekê li ser jiyana şehîdan ew bi bîr anîn.

Di çalakiyê de soza şopandina rêya şehîdan heta pêkanîna armanca şehîd Sakîne û hevrêyên wê hat dayîn.

Her wiha Tevgera Çanda Jinan a Hîlala Zêrîn bi çalakiyeke hunerî li Navenda Çand û Hunerê ya Baqî Xido hersê şehîd bi bîr anîn.

Koordînasyona Jinan a Rêveberiya Xweser a kantona Firatê jî semînerek li avahiya Rêveberiya Xweser da, tê de hevseroketiya Rêveberiya Xweser a kantona Firatê û endam û rêveberên saziyên sivîl ên kantonê beşdar bûn.

Semîner ji aliyê hevseroka Desteya Xwecih a kantona Firatê Felek Yûsif ve hat dayîn û li ser jiyana fermandara şehîd Sakîne Cansiz û hevrêyên wê Fîdan Dogan û Leyla Şaylemez bû.

Her wiha, hevseroka Desteya Maliyê Feryaz Berkel di semînerê de destnîşan kir ku şehîd Sakîne berxwedaneke mezin di girtîgehên dewleta Tirk a dagirker de da meşandin û di nav gelê Kurd de bi têkoşîna xwe ya ji bo azadiya jinan hat naskirin û êri bi hezaran Sakîne rêya wê dişopînin.

(mh)

ANHA