Şehîd Mizgîn li Helebê hat bibîranîn

Xelkê taxên Şêxmeqsûd û Eşrefiyê salvegera 32ˊyemîn a şehadeta hunermend, şehîd Mizgîn bi bîr anîn.

ROJANE

11 gulan, 2024 22:40

HELEB

Tevgera Hîlala Zêrîn bi hevkariya Navenda Cemîl Horo ya Çand û Hunerê ji bo bîranîna şehîd Mizgîn di salvegera şehadeta wê ya 32ˊyemîn de li qada Cebanat a li beşa rojhilat a taxa Şêxmeqsûdê çalakiyek li dar xist.

Di çalakiyê de xelkê taxên Şêxmeqsûd û Eşrefiyê, endamên saziyên sivîl û partiyên siyasî beşdar bûn.

Di çalakiyê de dayika şehîd Baz ku endama rêveber a Meclisa Malbatên Şehîdan a Xeta Şehîd Gelhat, Cumana Hemîd axivî û behsa rola şehîd Mizgîn di derxistina çanda Kurdî de kir.

Endama rêveber a Tevgera Hîlala Zêrîn Tizyan Çawîş axivî û got: "Şehîdan bi fedakariyên xwe, çi bi huner, pênûs û çekên xwe, rêya azadiyê ji me re xêz kirin. Da ku em jiyaneke azad, demokrat û ewle bijîn."

Dûre li ser hunermendên şehîd û rola wan di hunerê de sînevîzyonek hat pêşkêşkirin.

Her wiha endamên Tevgera Hîlala Zêrîn û Navenda Cemîl Horo ya Çand û Hunerê stranên hunermendên şehîd pêşkêş kirin.

(fr)

ANHA