Rêzeçalakiyên ji bo zarokan li kantona Cizîrê didomin
Rêzeçalakiyên bi dirûşma “Başbûn û Parastin, Pêşveçûn û Têgihaştin… Ji bo Zarokatiyeke Tendurist” ji bo piştgiriya zarokan li bajarên kantona Cizîrê didomin.
Desteya Jinan a Bakur û Rojhilatê Sûriyeyê di 21`ê Tebaxê de ji bo piştgiriya zarokan, zarokên astengdar û nexweş bi dirûşma “Başbûn û Parastin, Pêşveçûn û Têgihaştin.. Ji bo Zarokatiyeke Tendurist” dest bi kampanyayekê kir.
Di heman çarçoveyê de 8`ê Îlonê Desteya Jinan a Kantona Cizîrê bi pêşengiya Nivîsgeha Parastina Zarokan li kantona Cizîrê dest bi rêzeçalakiyan kir.
Îro jinên ku cihê xwe di kampanyayê de digirin, serdana Navenda ji bo Amadekirin û Fêrkirina Zarokan a Şehîd Êriş a li Qamişloyê kir.
Li baxçeyê navendê çalakiyên fêrkirinê ji bo zarokan hatin lidarxistin, piştre jî pêlîstok û diyarî pêşkêşî zarokan kirin. Her wiha belavokên têkildarî parastina zarokan ji tundiyê û rola malbat û civakê di parastina zarokan de, hatin belavkirin.
Kampanya heta 19`ê Mijdarê dê bidome û ew ê bi giştî serdana baxçeyên zarokan, navendên pêşxistina zarokan, zarokên şehîdan, zarokên astengdar û zarokên li kampan bikin.
(sb)
ANHA
