Rêxistina Mafên Mirovan panelek li ser aştiya navxweyî li dar xist

Rêxistina Mafên Mirovan a Efrîn-Sûriyeyê bi sponseriya Rêxistinên Civaka Demokratîk a Kantona Tebqayê bi boneya 10’ê Kanûnê Roja Mafên Mirovan a Cîhanê panelek bi navê "Aştiya navxweyî, hevgiritna civakî û edaleta veguhêz" li dar xist.

Civîn li hola Meclisa Gelan a bajarê Tebqayê bi amadebûna endamên yekitiyên civaka demokratîk, Meclisa Gelan a Kantona Tebqayê, Tevgera Çand û Hunerê, Partiya Sûriyeya Pêşerojê û koçberên Efrîn û Şehbayê hat lidarxistin.

Rêveberê Rêxistina Mafên Mirovan a Efrîn-Sûriyeyê Îbrahîm Şêxo têgeha aştiya navxweyî şîrove kir û ev tişt anî ser ziman "Ewlehî, aştî û jiyana hevbeş a civakê bi redkirina tundiyê, mîsogerkirina maf û azadiya mirovan, pêşxistina perwerdeyê, serxwebûna qada dadmendiyê, bi pêkanîna edalet, wekheviyê, her wiha bi diyalog, lihevhatina pêkhateyan û bi xebata hevbeş a avakirina civakeke hevgirtin û ewle pêkan e."

Şêxo destnîşan kir ku aştiya navxweyî ji bo bidestxistina pêşketin û geşkirinê pêwîstiyek e û da zanîn ku divê pirsgirêkên xizanî, gendelî, xîtabên kîndariyê ji holê werin rakirin.

 Şêxo her têgeha edaleta veguhêz û mekanîzmayên wê yên bingehîn şîrove kir û got: "Ji bo edalet pêk were divê berpirsên binpêkirinan werin darizandin. Divê komîteyên lêkolînkirina rastiyan û belgekirina binpêkirinan werin avakirin. Divê tazîmet û desteka madî û manewî bidin mexûran û malbatên wan. Di heman demê de divê saziyên ewlehî û dadweriyê ji nûve werin sererastkirin."

 Beşdaran diyar kirin ku gefên li ser aştiya navxweyî vedigire serdema rejîma berê û xîtabên mezhebî û kîndarî jî piştî rûxandina rejîmê pêş ketin. Hate gotin, li dijî van xîtaban divê hevgirtina civaka Sûriyeyê were xurtkirina û aştiya navxweyî li gelemperiya Sûriyeyê pêş bikeve.

Beşdaran gotin, divê hesab ji sûcdaran were pirsîn û li dijî xîtabên ku nefret û kînê belav dikin qanûn werin derxistin.

(b)

ANHA