Raporeke balê dikişîne ser rewşa aborî ya li herêmên hikumeta Şamê

Êş û azarên welatiyên li herêmên hikumeta Şamê zêdetir dibin ku ji ber bihabûnê û nebûna derfetên kar, di nava rewşeke aborî ya dijwar de ne. Li gorî raporeke SOHR’ê rewşa jiyanî girantir dibe.

25 ÇILE, 2024 13:34

NAVENDA NÛÇEYAN

Navenda Çavdêriya Mafên Mirovan a Sûriyeyê (SOHR) di raporeke xwe de bal kişand ser rewşa aborî û jiyanî ya li herêmên hikumeta Şamê.

Li gorî raporê, buhayê goştê mirîşkan 46 hezar lîre ye, sîngê mirîşkan jî 68 hezar û mirîşkên biraştî 96 hezar lîre ye.

Li gel vê rewşê û zivistanê, hikumeta Şamê sotemeniyê bihatir dike ku êdî ji hêza kirînê ya welatiyan zêdetir e. Lîtreya benzîna oktan-95 12 hezar û 160 lîre ye, benzîna oktan-90 bi 11 hezar û 675 lîre ye û lîtreya mazotê di sûka reş de 10 hezar û 900 lîre ye. Di encamê de barên welatiyan û êşên wan zêdetir bûne. Nemaze aloziyeke veguhastinê ya giştî heye û lêçûna wê li ser welatiyan giran e.

Li gorî raporê, li hember vê bihabûnê, beşeke mezin a welatiyan nerazî ne ku li ser malperên medyaya dijîtal bertekên xwe tînin ser ziman. Gelekan gotin buha ji hêza wan zêdetir in û hikumeta Şamê tawanbar kirin ku hewl dide bi derxistina biryaran û qanûnan û keysbaziya bazirganan, welatiyan birçî bike.

(şx)