Partiya Sûriya Pêşerojê civîneke gel li dar xist 

Partiya Sûriya Pêşerojê civînek li navenda Mecilsa Xwecih a bajarokê Sûse yê rojhilatê kantona Dêrazorê li dar xist. Di civînê de rûspiyên herêmê, endamên meclisên xwecih û saziyên sivîl hazir bûn.

Endamê Nivîsgeha Rêxistinî ya Partiya Sûriya Pêşerojê ya Dêrazorê Ela El Seîd axivî û behsa şerê di navbera Îsraîlê û Hemasê de, şerê Rûsya û Ukraynayê, bandorên wê li ser gelan bi giştî kir û diyar kir ku çareserî, projeya Rêveberiya Xweser e.

Têkildarî rewşa Sûriyeyê El Seîd diyar kir ku yek ji armancên Partiya Sûriya Pêşerojê avakirina Sûriyeyeke demokratîk a pirreng û nenavendî ye û ji xebatên serî pêşîn ên partiyê, vegera axa Sûriyeyê ku dewleta Tirk dagir kiriye û vegera penaberan e.

Her wiha El Seîd îşaret bi siyaseta valakirina herêmê ji ciwanan kir û got: "Vekirina rê li pêşiya koçberiyê, valakirina herêmê ji ciwanan e ku damara civakê ne."

El Seîd teqezî bi hişyarkirina ciwanan û hevkariya bi Rêveberiya Xweser re kir ji bo ku rê li pêşiya kesên dixwazin tevliheviyê li herêmê çêkin, bê girtin.

(şx)

ANHA