Parlementa Bexdayê ji ber dagirkeriya Tirk li hev dicive

Parlamenta Iraqê wê ji bo êrîşên dagirkeriyê yên dewleta Tirk û ambargoya li ser Balafirgeha Silêmaniyeyê bicive.

23 tîrmeh, 2024 13:14

NAVENDA NÛÇEYAN

Li gorî nûçeya RojNews’ê endamê Komîteya Veguhastinê ya Parlamenta Iraqê Fatîn Qerexolî ji rojnameya Sebah a ku li Iraqê weşandê dike re axivî û anî ziman ku ku beriya niha wan balafirgeha Silêmaniyeyê ziyaret kirine û der barê ambargoya li ser balafirgehê de bi Serokwezîrê Iraqê re hevdîtin kirine.

Fatîn Qerexolî nerazîbûn nîşanî ambargoya Tirkiyeyê ya li ser Balafirgeha Silêmaniyeyê da ku binpêkirina serweriya Iraqê ye û anî ziman ku Serokwezîrê Iraqê Mûhammed Şîa El Sûdanî ji bo çareseriya dîplomatîk a pirsgirêkê bang kir.

Li gorî heman nûçeyê, endamê Komîteya Ewlehî û Parastinê ya Parlamenta Iraqê Mihemed Şemerî jî anî ziman ku wê meclîs bi awayekî cidî li ser dagirkeriya dewleta Tirk a li ser deverên cuda yên parêzgeha Dihokê nîqaş bike.

Li gorî nûçeya rojnameya Sabahê Şemerî got, "Parlamenta Iraqê wê di vê mijarê de helwesteke zelal nîşan bide."