Li Bakur û Rojhilatê Sûriyeyê çalakiyên 8ˊê Adarê

Di çarçoveya çalakiyên bi boneya 8ˊê Adarê tên lidarxistin de li kantonên Tebqa, Şehba-Efrîn, Cizîrê û Minbicê yên Herêma Bakur û Rojhilatê Sûriyeyê rêzeçalakî hatin lidarxistin.

MINBIC

Endamên Meclisa Kombûna Jinan a Zenûbiya ya Kantona Minbicê bi boneya 8ˊê Adarê jinên karker ên di saziyên sivîl û leşkerî de pîroz kir. Endamên meclisê serdana Nexweşxaneya Feratê ya Minbicê, Meclisa Leşkerî ya Jinan, bendên ewlehiyê yên li bajêr, Meclisa Malbatên Şehîdan, gelek kargeh û avahiyên endustiyê yên bajêr kir û mertal û diyariyên sembolîk dan wan jinan.

DÊRAZOR

Endamên Meclisa Kombûna Jinan a Zenûbiya ya Kantona Dêrazorê serdana jinên kargehên ên di saziyên girêdayî Rêveberiya Xweseriya Demokratîk a Kantona Dêrazorê kir û ji kedên wan ên pêkanîna wekhevî û edaletê ji tevahî jinên civakê re diyarî û mertalên sembolîk dan wan.

REQA

Bi rêxistinkirina Meclisa Kombûna Jinan a Zenûbiya jinên Reqayê Qada Jina Azad, têketin û derketina bajêr bi pankartên ˊBi vîna jina azad, em ê siyasetên qirkirin, dagirkerî û tecrîdê têk bibinˊ, alên YPJˊê û Hêzên Ewlekariya Hundirîn xemilandin.

ŞEDADÊ

Têkildarî mijarê, li navçeya Şehdadê ya kantona Cizîrê bi diruşma ˊBi vîna jina azad em ê siyasetên qirkirin, dagirkerî û tecrîdê têk bibinˊ semînerek da. Semîner li hola Meclisa Gel a navçeyê bi beşdairya xelkê navçeya Holê, Mergeda, Erîşa û Şedadê hat dayîn.

Di semînerê de jineolojî û têkoşîna jina di serdeman de hatin nîqaşkirin.

Beşdaran Roja Jinan a Cîhanê pîroz kir û got jin bi saya fikir û felsefeya Rêber Abdullah Ocalan hatin rizgarkirin.

Semîner bi diruşmên ˊBê Serok Jiyan NabeˊûˊJin, Jiyan, Azadîˊ bi dawî bû.

ŞEHBA

Di heman çarçoveyê de Komîteya Perwerdê ya Kongra Star a Kantona Şehba-Efrînê ji mêran re dewreyeke perwerdê bi 3 rojan vekir.

Dewre li Akademiya Şehîd Karker a Kongra Star bi beşdariya 20 mêran ku temenê wan di navbera 25-60 salî de hate lidarxistin.

Ev dewre heta 4ˊê Adarê dewam dike û tê de li ser girîngiya roja 8ˊê Adarê, bandora vê rojê li ser têkoşîna jinan, pergala hevserokartiyê di Rêveberiya Xweser de tê nîqaşkirin.

HESEKÊ

Bi beşdariya bi sedan endamên Yekitiya Jinên Ciwan bi diruşma ˊJin, Jiyan, Azadîˊ meşek bi boneya 8ˊê Adarê hat lidarxistin.

Meş ji Çerxerêya Nesir a li taxa Salihiyê heta bi Yarîgeha Şehîdên El Mufî dest pê kir.

Li yarîgehê meş vegerî mîtîngê û li wir endama Koordînasyona Yekitiya Jinên Ciwan a Rojava Nadiya Yûsiv axivî û wiha got: "Jin beriya 5 hezar sal di civakan weke xwedawend dijiya, lê îro bi derketina netewe-dewletê û zihniyeta baviksalariyê jin di nêrîna gelak civakan de bûn kole."

Di dawiyê de Nadiya ev roj li tevahî jinên cîhanê pîroz kir.

Meş bi diruşmên silavkirina berxwedana jinan, şermezarkirina zulmê û bindestiyê bi dawî bû.

(fr)

ANHA