Ji konê sersaxiyê yê şehîd Nîzamedîn: Em ê rêya şehîdan bişopînin

Şêniyên Qamişlo, endamên saziyên sivîl, nûnerêm partiyên siyasî, rêxistinên civaka sivîl, Hêzên Ewlelariya Hundirîn û Hêzên Sûriya Demokratîk (QSD) berê xwe da konê sersaxiyê yê endamê Hêzên Ewlekariya Hundirîn şehîd Nîzamedîn Silêman. Şehîd Nîzamedîn di 3'yê Adarê de di encama krîza dil de dema li ser erka xwe bû şehîd bûn.

Merasîm li pêşiya mala şehîd Nîzamedîn li gundê Cumayê hat lidarxistin.

Di merasîmê de endamê Meclisa Malbatên Şehîdan a Qamişlo Mehmûd Ehmed sersaxî da malbata şehîd û malbatên tevahî şehîdan û got tevahî gel di oxira azadiya welat de hevgirtî ne û soza şopandina rêya şehîdan da.

'EM Ê HETA DAWIYÊ WAN BIPARÊZIN'

Rêveberê Hêzên Ewlekariya Hundirîn Îbrahîm Ebdullah got: "Me berê soz dabû gel û Rêberê xwe ku em ê heta dawiyê wan biparêzin. Îro jî em soza xwe nû dikin. Her kesê ku metirsiyê bide aramî û ewlehiya me em ê li hemberê bêbersiv nemînin û em ji vê rêyê venagerin."

'MÎNA ŞEHÎD NÎZAMEDÎN BEJN LI HEMBER TÊN TEWANDIN'

Hindirîn Xelîl têkoşîna şehîd Nîzamedîn bi bîr anî û got: "Ên wekî şehîd Nîzamedîn hêja ne ku em bejna xwe li hemberê bitewînin. Tevî ku ew ji 2014'an de tê dikoşe lê dîsa jî bi ruhekî welatparêzî hewl dida ewlehî û aramiyê li herêmê pêk bîne û li dawiyê gihîşt asta şehadetê."

Di dawiya merasîmê de wesîqeya şehadetê hat xwendin û radestê malbatê hat kirin

(mh)

ANHA