Însiyatîfa ‘Ciwanên li dijî Nefretê’ bi çend pêşniyaran bi dawî bû

Komeleya Nûjîn însiyatîfa xwe ya "Ciwanên li dijî Nefretê" bi pêşniyarên der barê medyayê, perwerde û qanûnan de bi dawî kir.

ROJANE

14 nîsan, 2026 14:45

HESEKÊ

Komeleya Nûjîn a Pêşxistina Civakê komcivîna dawîn a însiyatîfa "Ciwanên li dijî Nefretê" li Hola Xabûr a Hesekê, bi beşdariya nûnerên beşên cuda civakê li dar xist.

Beriya komcivê rêzeçalakiyên wekî atolyeyên perwerdeyê, rûniştinên diyalogê û kampanyayên dîjîtal hatibûn lidarxistin.

Di komcivînê de ji bo pêşîgirtina nefretê, di hêla medya, perwerde û yasayî de pêşniyar hatin pêşkêşkirin û plana pêkanîna wan hat danîn. Armanca pêşniyaran ew e zimanê nefretê were kêmkirin û hevgirtina civakî were xurtkirin.

Di komcivînê de hat pêşniyarkirin ku komîteyeke şopandinê bi hikumeta demkî re were avakirin. Ev komîte ku dê ji aliyê parêzgarê Hesekê ve were birêvebirin û nûnerên Wezareta Ragihandinê, Rêveberiya Perwerdeyê, Dozgeriya Giştî û 3 rêxistinên civaka sivîl di nav de bin. Komîte dê pêşniyarên civînê binirxîne, planeke pêkanîna hevbeş çêke û civînên mehane li dar bixe da ku pêşveçûnê bişopîne.

Komeleya Nûjîn a Pêşxistina Civakê li Hesekê di dawiya sala 2025`an de însiyatîfa xwe ya civakî ya bi navê "Ciwanên li dijî Nefretê" dabû destpêkirin.

(k)